BAYRAM GÜNÜ VƏTƏNİN MÜDAFİƏÇİLƏRİ İLƏ
Bakı, 24 iyun (AZƏRTAC). Gənclərin Vətənə məhəbbət və vətənpərvərlik ruhunda tərbiyə olunmasını fəaliyyətinin öncül istiqamətlərindən biri seçmiş Bakı Şəhəri Gənclər və İdman Baş İdarəsinin əməkdaşları Azərbaycan Silahlı Qüvvələri günü ərəfəsində paytaxtın bir sıra hərbi hissələrində olmuşlar.
Belə görüşlərdən biri iyunun 24-də Binəqədi rayonunun rəhbərliyinin, Yeni Azərbaycan Partiyasının fəalları, incəsənət ustalarının iştirakı ilə keçirilmişdir.
Qonaqlar hərbi hissədə yaradılmış şəraitlə tanış olmuş, Azərbaycan hərbçilərinin döyüş ruhunu yüksək qiymətləndirmişlər.
İdarənin rəisi Raqif Abbasov əsgər və zabitləri təbrik edərək bildirmişdir ki, Bakı Şəhər Gənclər və İdman Baş İdarəsinin əməkdaşları təkcə Bakıdakı deyil, bölgələrdəki hərbi hissələrdə də olurlar. Dövlətimizin siyasi və iqtisadi qüdrətinin artması Azərbaycan Ordusunun müdafiə qabiliyyətinin möhkəmlənməsinə səbəb olmuşdur. Ordumuz Ali Baş Komandan, Prezident İlham Əliyevin əmrini hər an yerinə yetirməyə hazırdır. Zabitlər, Binəqədi Rayon İcra Hakimiyyətinin nümayəndələri çıxışlarında gənclərin məşhur Azərbaycan sərkərdələrinin nümunəsində tərbiyə olunmasının vacibliyini vurğulamışlar.
Sonra nümunəvi hərbi xidmətə görə bir sıra zabit, gizir və əsgərlər idarənin fəxri fərmanlarına və qiymətli hədiyyələrə layiq görülmüşlər.
Armlestlinq və breyn-rinq intellektual oyunları üzrə yarışlar keçirilmiş, incəsənət ustalarının konserti olmuşdur.
Bölmənin digər xəbərləri
