BDU aliminin beynəlxalq tibb hüququ haqqında kitabı nəşr olunub
Bakı, 25 aprel, AZƏRTAC
Bakı Dövlət Universitetinin (BDU) Hüquq fakültəsinin Beynəlxalq xüsusi hüquq və Avropa hüququ kafedrasının dosenti, Dünya Tibbi Hüquq Assosiasiyasının üzvü, hüquq üzrə fəlsəfə doktoru Fatimə Hüseynovanın “Beynəlxalq tibb hüququ haqqında ümumi müddəalar” kitabı nəşr olunub.
Bu barədə AZƏRTAC-a BDU-dan məlumat verilib.
Hüquq fakültəsinin dekanı hüquq üzrə fəlsəfə doktoru, dosent Zaur Əliyevin baş redaktorluğu ilə nəşr olunan kitab Azərbaycan Respublikasında beynəlxalq tibb hüququ haqqında ilk nəşrdir.
Sözügedən fundamental əsərdə beynəlxalq tibb hüququna və onun ayrı-ayrı institutlarına doktrinal anlayış verilir, tibb fəaliyyəti üzrə münasibətlərin və əlaqələrin hüquqi tənzimlənməsinin xüsusiyyətləri şərh edilir. Müasir dövrdə səhiyyə, təbabət və tibb sferasında baş verən qlobal inteqrasiya prosesləri fonunda əhalinin maariflənməsi, cəmiyyətdə hüquqi düşüncə və tibb mədəniyyətinin formalaşması baxımından kitab mühüm əhəmiyyətə malikdir.
Kitabdan ali məktəb tələbələri, müəllimlər, hüquqşünaslar, tibbi hüquq elmi sahəsində çalışan mütəxəssislər, praktik işçilər və digər şəxslər faydalana bilərlər.
Nəşr BDU-nun Hüquq fakültəsinin 95 illiyinə həsr olunub.
Bölmənin digər xəbərləri
