BDU-da “ABŞ və Azərbaycanda jurnalistika təhsili” mövzusunda elmi seminar
Bakı, 10 oktyabr, AZƏRTAC
Bakı Dövlət Universitetinin (BDU) Jurnalistika fakültəsinin Yeni media və kommunikasiya nəzəriyyəsi kafedrasının müəllimi Anzulə Cəfərovanın “ABŞ və Azərbaycanda jurnalistika təhsili” mövzusunda elmi seminarı keçirilib.
Universitetdən AZƏRTAC-a verilən məlumata görə, kafedra müdiri dosent Xatirə Hüseynova bildirib ki, Anzulə Cəfərova “ABŞ institutlarının öyrənilməsi” (“SUSI for scholars”) adlı akademik tədqiqat proqramında iştirak edib. Elmi seminarın mövzusu Arizona Dövlət Universitetində jurnalistika təhsilində tətbiq olunan modelin Azərbaycanda jurnalistika təhsili ilə müqayisəli təhlilinə həsr olunub.
Anzulə Cəfərova hazırda dünyada jurnalistika təhsilində olan yeniliklər, “Tədris xəstəxanası” “Walter Cronkite” Jurnalistika və Kütləvi Kommunikasiya Məktəbində tətbiq olunan model barədə ətraflı çıxış edib. O bildirib ki, jurnalistika və tibbi təhsilin müqayisə olunduğu modeldə mətbuatın cəmiyyətə birbaşa təsiri vurğulanır, tələbələrin bu istiqamətdə peşəkar qabiliyyətlərə yiyələnmələrinin önəmi göstərilir. Həmin modelin uğuru müəllim, tələbə və peşəkarların birgə fəaliyyətinə əsaslanır. Məruzəçi, həmçinin BDU-nun Jurnalistika fakültəsində bu modelin tətbiqi ilə bağlı atılan addımları xüsusi dəyərləndirib.
İnteraktiv şəkildə keçən elmi seminarda iştirakçıların mövzu ilə bağlı sualları cavablandırılıb.
Bölmənin digər xəbərləri
