BDU-da “Fizikada müasir trendlər" mövzusunda 8-ci beynəlxalq elmi konfrans keçirilib
Bakı, 30 noyabr, AZƏRTAC
Bakı Dövlət Universitetinin (BDU) ev sahibliyi və təşkilatçılığı, İtaliyanın Milli Nüvə İnstitutu, ABŞ-ın Delaver Universiteti, Pakistanın Lahor Universiteti və COMSATS İslamabad Universiteti, Türkiyənin Ankara Universiteti, Orta Doğu Texniki Universiteti, Qazi Universiteti və Sivas Cümhuriyyət Universitetinin həmtəşkilatçılığı ilə Azərbaycan xalqının Ümummilli Lideri Heydər Əliyevin 100 illik yubileyinə həsr olunmuş “Fizikada müasir trendlər” mövzusunda 8-ci beynəlxalq elmi konfransın açılış mərasimi keçirilib.
Əvvəlcə Azərbaycan Respublikasının Dövlət Himni səsləndirilib, Ulu Öndər Heydər Əliyevin və şəhidlərimizin əziz xatirəsi anılıb. Sonra Azərbaycan haqqında videoçarx nümayiş olunub.
AZƏRTAC xəbər verir ki, mərasimdə çıxış edən BDU-nun rektoru Elçin Babayev beynəlxalq elmi konfransın Azərbaycan xalqının Ümummilli Lideri, müstəqil Azərbaycan dövlətinin qurucusu, görkəmli siyasi və dövlət xadimi, ölkəmizdə elmin böyük hamisi Heydər Əliyevin 100 illik yubileyinin qeyd olunduğu “Heydər Əliyev İli”nə təsadüf etdiyini bildirib. Vurğulayıb ki, konfransın suverenliyimizin tam bərpa olunduğu ildə keçirilməsi onu daha da yaddaqalan edir. Rektor qeyd edib ki, 2009-cu ildən başlayaraq iki ildən bir keçirilən konfransın materiallar toplusu 2017-ci ildən “Web of Science” bazasında indekslənir. Builki konfransda Azərbaycan, Türkiyə, İsrail, Pakistan, İtaliya, Almaniya, Çin, Makedoniya, Misir, Səudiyyə Ərəbistanı, Mərakeş, Argentina, Rumıniya, Kanada, Macarıstan, Albaniya, Portuqaliya, Sudan, İspaniya, ABŞ, Rusiya, Belçika, Özbəkistan, Ukrayna və Gürcüstan da daxil olmaqla 25 ölkə təmsil olunur. Təşkilat komitəsinin hesabatına əsasən, konfransın proqramına 149 məruzə daxil edilib: “Konfransın əvvəlki illərdə olduğu kimi, gənc tədqiqatçı və alimlər üçün yeni platformalar formalaşdıracağına, mühüm elmi prioritetlər müəyyən edəcəyinə inanırıq. Bugünkü konfransda fizikanın ən aktual problemlərinə toxunulacaq, innovativ yönümlü, istehsalatla bağlı yeni mövzular müzakirə ediləcək, konvergens düşüncəli gənclər - tələbə, magistrant və doktorantların məruzələri dinləniləcək. Azərbaycanda elmin prioritet inkişaf istiqamətləri müəyyənləşdirilərkən maddi-mənəvi dəyərlərin qorunması ilə yanaşı, beynəlxalq arenaya sürətli inteqrasiya da xüsusi diqqətdə saxlanılır. Digər tərəfdən, həmişə olduğu kimi, aparılan tədqiqatların səmərəliliyinin artırılmasına, onların nəticələrinin sosial-iqtisadi və sənaye-istehsalat sahələrində tətbiqinin təmin edilməsinə, tədris prosesinə bağlılığına xüsusi önəm verilir.
Bu istiqamətdə ali təhsil müəssisələrinin üzərinə də mühüm vəzifələr düşür. Bakı Dövlət Universiteti də digər ali təhsil müəssisələri kimi, Azərbaycanda elmi-texniki potensialın formalaşması, qorunması, bu potensialdan səmərəli istifadə edilməsində yaxından və uğurla iştirak edir, bu istiqamətdə aparıcı qüvvələrdən birinə çevrilib.
Təbii ki, universitetdə təşkil edilən elmi fəaliyyətin digər elmi müəssisələrdə və ali məktəblərdə aparılan elmi-tədqiqat fəaliyyəti ilə əlaqələndirilməsinə də xüsusi diqqət edilir.
Böyük qürur hissi ilə bildiririk ki, Prezident İlham Əliyevin Sərəncamı ilə Xankəndi şəhərində yaradılan və elm-təhsil mərkəzlərindən birinə çevriləcək Qarabağ Universiteti bu baxımdan xüsusi yerə malik olacaq.
BDU-da kompleks məqsədli proqramların işlənilməsi, universitetin beynəlxalq elmi layihə və proqramları həyata keçirən güclü mərkəzə çevrilməsi məqsədilə bir sıra mühüm addımlar atılır. Elmi mübadilə çərçivəsində dünyanın nüfuzlu ali məktəblərindən, elm mərkəzlərindən olan alimlərin birgə tədqiqatlara cəlb olunması təcrübəsinin genişləndirilməsinə də önəm verilir.
Son illər müasir dövrün tələblərinə cavab verən yüksəkixtisaslı elmi kadrların hazırlanması sahəsində, xarici ölkələrdə təhsil almaq və təcrübə keçmək yolu ilə peşəkar tədqiqatçılardan ibarət gənc nəslin formalaşması işində müsbət dinamika müşahidə olunur”.
Azərbaycan Dövlət Pedaqoji Universitetinin rektoru Cəfər Cəfərov, Bakı Slavyan Universitetinin rektoru Anar Nağıyev, Elm və Təhsil Nazirliyi Fizika İnstitutunun baş direktoru Arif Həşimov, Azərbaycan Respublikasının Prezidenti yanında Ali Attestasiya Komissiyasının sədr müavini Sakin Cabbarov, Bilkent Universitetinin professoru Əmirulla Məmmədov, İtaliyanın Milli Nüvə Fizikası İnstitutunun Frascati Milli Laboratoriyasının müdiri Stefano Bellucci, Elm və Təhsil Nazirliyi Molekulyar Biologiya və Biotexnologiyalar İnstitutunun baş direktoru İradə Hüseynova, Rusiyanın Birləşmiş Nüvə Tədqiqatları İnstitutunun Nüvə problemləri laboratoriyasının müdiri Yevgeni Yakuşev, Ankara Universitetinin professoru İman Əsgərzadə, Orta Doğu Texniki Universitetinin professoru Təhmasib Əliyev, Makedoniyanın Kiril Metodius İnstitutunun professoru Jadranka Blajevskaya, İnstinye Universitetinin Əczaçılıq fakültəsinin dekanı Atilla Akdeniz çıxışlarında fizikanın müxtəlif sahələrinin inkişafında müasir tendensiyaları qeyd edib, konfransın işinə uğurlar arzulayıblar.
Daha sonra Pakistanın Lahor Universitetinin rektoru Muhammad Aşraf, Türkiyənin Sivas Cümhuriyyət Universitetinin rektoru Alim Yıldız, Lənkəran Dövlət Universitetinin rektoru Natiq İbrahimov, COMSATS Universitetinin rektoru Sacid Qamar, ABŞ-ın Delaver Universitetinin professoru İsmət Şah, Qazi Universitetinin professoru Süleyman Özçelik, Ankara Universitetinin prorektoru Mustafa Fener konfrans iştirakçılarına onlayn və videotəbriklər ünvanlayıblar. Videotəbriklərdə konfransın beynəlxalq və ölkə səviyyəsində fizikanın inkişafına töhfə verəcəyinə, yeni fizika məktəblərinin yaranacağına əminlik vurğulanıb.
Beş bölmə ilə işini davam etdirən konfrans sabah yekunlaşacaq.
Bölmənin digər xəbərləri
