BDU-da respublika virtual elmi konfransı: Heydər Əliyev Müasir Azərbaycanın qurucusudur
Bakı, 11 iyun, AZƏRTAC
İyunun 11-də Bakı Dövlət Universitetində (BDU) 15 iyun - Milli Qurtuluş gününə həsr olunmuş “Heydər Əliyev Müasir Azərbaycanın qurucusudur” mövzusunda respublika virtual elmi konfransı keçirilib.
BDU-dan AZƏRTAC-a bildirilib ki, konfransı giriş sözü ilə açan rektor Elçin Babayev ulu öndər Heydər Əliyevin çoxşaxəli fəaliyyətindən, Azərbaycanın inkişafı, müstəqilliyimizin qorunması və milli dövlətçiliyimizin gücləndirilməsi istiqamətində misilsiz tarixi xidmətlərindən, böyük xilaskarlıq missiyasından danışıb. 1993-cü ilin iyun ayında ulu öndər Heydər Əliyevin Azərbaycanda siyasi hakimiyyətə qayıdaraq xilaskarlıq missiyasını yerinə yetirməsi nəticəsində 15 iyun tarixinin respublikamızda Milli Qurtuluş Günü kimi qeyd olunduğunu bildirib.
Rektor qeyd edib ki, ulu öndər Heydər Əliyevin yenidən hakimiyyətə qayıdışı ilə Azərbaycanda müstəqilliyin, suverenliyin qorunması, ölkədə ictimai-siyasi sabitliyin bərpa edilməsi mümkün oldu. Ümummilli lider Heydər Əliyevin uğurlu uzaqgörən siyasəti nəticəsində Azərbaycan 90-cı illərin əvvəllərində blokadadan çıxdı, ölkəmizin imici gücləndirildi.
E.Babayev Ümummilli Liderin sayəsində Azərbaycanın dünyanın inkişaf edən, beynəlxalq miqyasda nüfuzunun gündən-günə artan dövlətə çevrildiyini, yeni iqtisadi uğurlara imza atdığını deyib. Vurğulayıb ki, Azərbaycanın müstəqil dövlət kimi mövcudluğunun qorunub saxlanılması, inkişafı, ölkəmizdə sabitlik və həmrəyliyin təmin olunması bilavasitə Ulu Öndərin adı ilə bağlıdır.
Rektor, həmçinin Ulu Öndərin uzaqgörən siyasəti nəticəsində ölkədə əmin-amanlığın, siyasi sabitliyin yarandığını, ictimai-siyasi, sosial-iqtisadi, elmi və mədəni həyatda əsaslı dönüşün, xalqın həmrəyliyinin, milli birliyinin təmin edildiyini, Azərbaycanın dünya birliyinə inteqrasiyasının başlandığını bildirib.
BDU-nun rəhbəri vurğulayıb ki, Azərbaycanın dünya ölkələri sırasında öz layiqli yerini tutmasında və milli-mənəvi dəyərlərimizin qorunmasında, xüsusilə tolerantlığın və multikultural ənənələrin inkişaf etdirilərək dünyaya çatdırılmasında ulu öndər Heydər Əliyev siyasi kursunun davamçısı Azərbaycan Prezidenti İlham Əliyevin xidmətləri misilsizdir.
Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov “Milli qurtuluş Azərbaycan dövlətçiliyinin müasir inkişaf strategiyasının təməlidir” mövzusunda məruzə ilə çıxış edib.
Onlayn tədbirdə “Ulu Öndərin siyasi irsi”, “Müasir Azərbaycan dövlətinin banisi Heydər Əliyev”, “Müasir Azərbaycanın iqtisadi inkişafı milli qurtuluşdan başlayır”, “Böyük qayıdışdan başlayan qurtuluş”, “Müstəqilliyin Qayıdışı: Heydər Əliyevdən İlham Əliyevə”, “Azərbaycanda böhran və ondan çıxış yollarının axtarışı”, “Qurtuluş yolunun zəfərləri”, “Milli qurtuluşun banisi Heydər Əliyev”, “Milli qurtuluş və Azərbaycan gəncliyi”, “Müstəqil Azərbaycan respublikasının inkişafında və möhkəmləndirilməsində Heydər Əliyevin yeri və rolu”, “Azərbaycan tarixində dönüş anı - Milli Qurtuluş günü” mövzularında çıxışlar dinlənilib.
Çıxışlarda xalqımızın tarixinə böyük xilaskar kimi adını həkk etdirən dahi şəxsiyyət Heydər Əliyevin Azərbaycana rəhbərlik etdiyi müxtəlif dövrlərdə uzaqgörənliklə atdığı addımlardan, ölkəyə qoyulan güclü sosial, mədəni, iqtisadi və intellektual sərmayələrdən, Azərbaycan dövlətinin müstəqilliyi və inkişafı yolunda misilsiz xidmətlərindən geniş bəhs olunub. Azərbaycanın hərtərəfli tərəqqisi yolunda böyük tarixi xidmətlər göstərən, dövlət müstəqilliyinin və təhlükəsizliyinin qorunmasına əvəzsiz töhfələr verən Heydər Əliyevin Vətənə sədaqət, xalqa fədakarlıqla xidmət nümunələrindən söz açılıb. Qeyd olunub ki, bütün varlığı ilə Vətənə və xalqına bağlı olan dövlət xadimi Heydər Əliyev öz həyatını, zəngin dövlətçilik təcrübəsini Azərbaycanın xoşbəxt gələcəyinə, onun inkişaf etmiş dövlətlər sırasında öz layiqli yerini tutmasına həsr edib.
“Microsoft Teams” platforması üzərindən təşkil olunan, 120-dən çox iştirakçının qatıldığı elmi konfransda Milli Məclisin deputatları, BDU-nun professor-müəllim heyəti, tələbə və doktorantlar və dəvətli qonaqlar iştirak ediblər.
Respublika elmi konfransı iştirakçıların suallarının cavablandırılması ilə yekunlaşıb.
Bölmənin digər xəbərləri
