BDU-da seminar: Tərtərçayda yeraltı suların yayılma qanunauyğunluqları
Bakı, 2 mart, AZƏRTAC
Bakı Dövlət Universitetinin (BDU) Geologiya fakültəsində “Tərtərçay gətirmə konusunda yeraltı suların yayılma qanunauyğunluqları və ekomeliorativ vəziyyətə təsiri” mövzusunda elmi seminar olub.
Bu barədə AZƏRTAC-a BDU-dan məlumat verilib.
Seminarda məruzə ilə çıxış edən Hidrogeologiya və mühəndis geologiyası kafedrasının müəllimi Günay Hüseynova Tərtərçay gətirmə konusu hüdudlarında müasir və IV dövr çöküntülərinin müxtəlif dərinliklərdə formalaşması haqqında məlumat verib. Qeyd edilib ki, qrunt sularının yatma dərinliyi 1-10 metr arasında dəyişir və qərbdən şərqə doğru yer səthinə yaxınlaşır. Onların yerləşmə dərinliyi gətirmə konusunun geomorfoloji xüsusiyyətləri, relyefin xarakteri, süxurların litoloji tərkibi və sukeçirmə əmsalı, qrunt sularının qidalanma şəraiti və sərfindən asılı olaraq formalaşır. Tərtərçay gətirmə konusu ərazisində təzyiqli sulu horizontlar geniş yayılıb. Gətirmə konusunun yüksək sahələrində yeraltı sular vahid təzyiqsiz sulu horizontu əmələ gətirdiyi halda, periferiya zonasına doğru vertikal istiqamətlərdə yaxşı su keçirən və su keçirməyən çöküntülərlə təbəqələnmə hesabına bir neçə sulu laylara ayrılır. Üst sulu horizont təzyiqsiz sular hesab olunur. Təzyiqli sulu horizontlarda dərinliyə getdikcə suyun təzyiqi artır. Yeraltı sular eyni qidalanma mənbəyinə və hidravliki əlaqələrə malik olan yeraltı təzyiqli su kompleksini əmələ gətirir.
Sonra iştirakçıların sualları cavablandırılıb.
Bölmənin digər xəbərləri
