Bəhruz Quliyev: Problemlərə həssas yanaşması Azərbaycan Prezidentinin vətəndaşlara verdiyi dəyərin göstəricisidir
Bakı, 30 mart, AZƏRTAC
Azərbaycanda sahibkarlığın inkişafına, biznes mühitinin yaxşılaşdırılmasına dövlət tərəfindən daim qayğı göstərilir. Bakının Nizami rayonundakı ticarət mərkəzində baş verən yanğın hadisəsindən sonra Prezident İlham Əliyevin sədrliyi ilə keçirilən müşavirə bir daha göstərdi ki, dövlətimizin başçısı hər zaman sahibkarların yanındadır.
Bu fikirləri AZƏRTAC-a açıqlamasında “Səs” media qrupun rəhbəri, siyasi ekspert Bəhruz Quliyev deyib.
Ekspert bildirib ki, yanan ticarət mərkəzində çalışan sahibkarlar əslində əmlaklarını sığorta etməli və haqlarını da onlardan tələb etməli idilər. Azərbaycan dövləti sahibkarın fəaliyyəti üçün geniş imkanlar, səmərəli mühit yaradıb, onların sərbəst fəaliyyətinin təşkili ilə əlaqədar müxtəlif güzəştlər edilir. Prezidentin bu məsələni dərhal nəzarətə götürməsi və həmin sahibkarlara dövlət yardımı ilə bağlı Sərəncam imzalaması onun hər addımı ilə vətəndaşın yanında olduğunu bir daha nümayiş etdirdi.
B.Quliyev qeyd edib ki, Azərbaycan Prezidentinin təkcə yanğın hadisəsi zamanı deyil, ümumiyyətlə, ölkədə cərəyan edən bütün proseslərə çevik reaksiyası, problemlərə həssas yanaşması ölkə vətəndaşlarına verdiyi dəyərin göstəricisidir. Dünyanın heç bir ölkəsində dövlət təbii fəlakətlər və texnogen qəzalar zamanı vətəndaşların mülkiyyətinə dəyən ziyanın ödənilməsini öz üzərinə götürmür. Azərbaycan Prezidenti tərəfindən bu istiqamətdə atılan addımlar liderin şəxsi iradəsinin, eyni zamanda, aparılan siyasətin mərkəzində Azərbaycan vətəndaşı amilinin dayandığının təzahürüdür. Azərbaycan dövləti bu dəfə də öz vətəndaşını darda qoymadı. Prezident İlham Əliyev hər addımı ilə vətəndaşın yanında olduğunu sübut etdi.
Bölmənin digər xəbərləri
