BERTİ FOQTS: NƏTİCƏ BİZİM ÜÇÜN ƏHƏMİYYƏTLİDİR
Bakı, 8 oktyabr (AZƏRTAC). Lixtenşteynin paytaxtı Vaduts şəhərindəki “Reynpark” stadionunda Azərbaycan milli komandasının baş məşqçisi Berti Foqtsun mətbuat konfransı keçirilmişdir.
AFFA-nın saytının yaydığı xəbərə görə, B.Foqts millimizin təlim-məşq toplanışı və Lixteynşteyn yığması ilə keçirəcəyi oyunla bağlı fikirlərini bildirmişdir: “Qarşıdakı oyun həm Lixteynşteyn yığması, həm də bizim üçün böyük maraq doğurur. Öz meydanında oynaması Lixteynşteyn komandasına əlavə üstünlük verir. Nəticə bizim üçün əhəmiyyətlidir. Təəssüf ki, bu oyunda 2 əsas futbolçumuz çıxış etməyəcək.”
B.Foqts yığma komandadakı işindən razı qaldığını bildirmişdir: “Azərbaycandakı işimdən xoşum gəlir. Hesab edirəm ki, düzgün yoldayıq. AFFA tərəfindən komandaya hər cür şərait yaradılır. Əlbəttə, problemlər də var. Millinin bəzi oyunçuları klublarında heyətə düşməkdə çətinlik çəkirlər. Fikirlərimə yekun vuraraq onu demək istəyirəm ki, oktyabrın 10-da bizi çətin və maraqlı oyun gözləyir.”
Bölmənin digər xəbərləri
