Beyləqanda narkotik vasitələrin alqı-satqısı ilə məşğul olan şəxs tutulub
Bakı, 10 fevral, AZƏRTAC
Beyləqan Rayon Polis Şöbəsinin əməkdaşları narkotik vasitələrin qanunsuz dövriyyəsi və alqı-satqısı ilə məşğul olan şəxslərə qarşı növbəti uğurlu əməliyyat tədbiri həyata keçiriblər.
Daxili İşlər Nazirliyinin mətbuat xidmətinin Bərdə regional qrupundan AZƏRTAC-a bildiriblər ki, Beyləqan Rayon Polis Şöbəsi əməkdaşlarının fevralın 7-də daxil olmuş məlumat əsasında keçirdikləri əməliyyat-axtarış tədbirləri nəticəsində şəhər sakini, əvvəllər məhkumluğu olan M.Muxtarov qurudulmuş marixuananı 120 manata satmaq istəyərkən saxlanılaraq polis şöbəsinə gətirilib. Onun üzərinə baxış keçirilən zaman satış məqsədilə üzərində daşıdığı 400 qrama yaxın marixuana aşkarlanaraq götürülüb. Davam etdirilən tədbirlərlə onun yaşadığı ünvana baxış keçirilib və oradan 360 qramdan artıq qurudulmuş marixuana aşkar edilərək maddi sübut kimi götürülüb.
Faktla bağlı cinayət işi başlanılıb, təhqiqat aparılır.
Bölmənin digər xəbərləri
