Beyləqanlılar Xocalı faciəsi qurbanlarının xatirəsini ehtiramla yad etmişlər
Beyləqan, 25 fevral (AZƏRTAC). Xocalı faciəsinin 21-ci ildönümü Beyləqanda silsilə tədbirlərlə qeyd edilmişdir.
AZƏRTAC xəbər verir ki, fevralın 25-də Beyləqan şəhərində dövlət bayrağı meydanında Xocalı faciəsinin 21-ci ildönümünə həsr olunmuş fotosərgi keçirilmişdir. Sərgidə ermənilərin xalqımıza qarşı törətdikləri soyqırımının dəhşətlərini əks etdirən fotolar nümayiş olunmuşdur.
Həmin gün “Azərbaycanlıların soyqırımı” abidə kompleksi qarşısında ümumrayon anma mərasimi olmuşdur. Rayon rəhbərliyi, ağsaqqallar, gənclər, ziyalılar, müharibə veteranları, əmək kollektivlərinin nümayəndələri, məktəblilər abidə-kompleksinin önünə gül dəstələri düzərək faciə qurbanlarının xatirəsini ehtiramla yad etmiş, şəhidlərin ruhuna dualar oxunmuşdur.
Tədbirdə çıxış edənlər Azərbaycan xalqının qan yaddaşı olan Xocalı faciəsindən, ermənilərin xalqımıza qarşı törətdikləri vəhşiliklərdən danışmışlar. Çıxışlarda günahsız insanlara - uşaqlara, qadınlara, qocalara qarşı törədilmiş bu qırğın faktı bəşəriyyətə qarşı əsl soyqırımı kimi qiymətləndirilmişdir.
Bölmənin digər xəbərləri
