BEYNƏLXALQ HÜQUQ SAHƏSİNDƏ ƏMƏKDAŞLIĞA AZƏRBAYCANIN TÖHFƏSİ YÜKSƏK QİYMƏTLƏNDİRİLMİŞDİR
Xəbər verdiyimiz kimi, mayın 16-17-də dünya prokurorluq xidmətlərinin ilk və yeganə beynəlxalq təşkilatı olan Beynəlxalq Prokurorlar Assosiasiyasının rəhbər orqanının - İcraiyyə Komitəsinin növbəti iclası Bakı şəhərində keçirilmişdir.
İcraiyyə Komitəsinin iclasının Azərbaycanda keçirilməsi təsadüfi olmamışdır. Belə ki, Assosiasiyanın yarandığı ilk illərdən onun təşkilati üzvlüyünə qəbul edilmiş Azərbaycan Prokurorluğunun nümayəndələri təşkilatın bütün konfrans və yığıncaqlarında fəal iştirak etmiş, bir neçə dəfə Assosiasiyanın fəxri təltiflərinə layiq görülmüş, nümayəndələrimizin məruzələri yığıncaqların müzakirə olunan məsələlər üzrə rəsmi materiallarına daxil olunmuşdur.
1998-ci ildə Azərbaycan nümayəndəsi səmərəli əməkdaşlığın nəticəsi olaraq, Assosiasiyanın İcraiyyə Komitəsinin üzvü seçilmişdir. Ötən ilin sentyabrında təşkilatın sonuncu ümumi yığıncağında ədliyyə naziri Fikrət Məmmədov İcraiyyə Komitəsinə yenidən üzv seçilmiş, Azərbaycan MDB və region dövlətləri arasında bu mötəbər beynəlxalq təşkilatın rəhbər orqanında təmsil edilən yeganə ölkə olmuşdur.
Möhtərəm Prezidentimizin rəhbərliyi ilə ölkəmizdə həyata keçirilən məhkəmə-hüquq islahatı və bunun əsasında Azərbaycan Prokurorluğunda aparılan köklü dəyişikliklərin müsbət nəticəsi olaraq məhz həmin tədbirdə təşkilatın İcraiyyə Komitəsinin iclasının Bakıda keçirilməsi qərara alınmışdır.
Bəşəriyyəti sarsıdan terrorçuluğa, transmilli mütəşəkkil cinayətkarlığa qarşı mübarizə dünyanın bütün hüquq mühafizə orqanlarının, o cümlədən prokurorların səylərinin birləşdirilməsini zəruri etmişdir.
Dünyanın inkişaf etmiş ölkələrinin prokurorluq və digər hüquq-mühafizə orqanları rəhbərlərinin təmsil olunduğu Beynəlxalq Prokurorlar Assosiasiyası İcraiyyə Komitəsinin iclasının erməni terrorizmi ilə üz-üzə qalmış Azərbaycan Respublikasında keçirilməsi beynəlxalq strukturların Azərbaycan həqiqətləri ilə daha yaxından tanış olmasına şərait yaratmış, dünya hüquq-mühafizə xidmətlərinin diqqəti Ermənistan tərəfindən ərazimizin 20 faizinin işğal edilməsinə, işğal altında olan həmin ərazidə heç bir beynəlxalq təşkilatın belə nəzarət edə bilmədiyi terrorçuluq və cinayətkarlıq yuvasının yaradılmasına cəlb edilmişdir.
Bakı şəhərinə səfərlərini Şəhidlər xiyabanını ziyarət etməkdən başlayan 15-dək dövlətin prokurorluq və digər hüquq-mühafizə orqanları rəhbərlərinin iştirak etdiyi iclası Azərbaycan Respublikasının Baş prokuroru Zakir Qaralov açaraq, qonaqları səmimi salamlamış, Azərbaycan Respublikasının Prezidenti cənab Heydər Əliyevin iclas iştirakçılarına müraciəti oxunmuşdur.
Azərbaycan dövlətinin hüquq sistemi və ölkəmizdə aparılan islahatlar, respublikamızın məruz qaldığı erməni təcavüzü barədə materialları özündə əks etdirən xüsusi jurnal və digər vəsaitlər tədbir iştirakçılarına təqdim olunmuşdur.
İki gün davam edən iclasda mühüm təşkilati məsələlər müzakirə edilmiş, Assosiasiyanın Londonda keçiriləcək növbəti Konfransının Nyu-York və Vaşinqtonda baş vermiş dəhşətli terror aktlarının ildönümü ərəfəsinə təsadüf etməsi nəzərə alınaraq, terrorçuluqla bağlı mövzunun gündəliyə əlavə edilməsi, bununla əlaqədar bir sıra digər tədbirlərin də həyata keçirilməsi qərara alınmışdır. Həmçinin, təşkilatın 2003-cü ildəki konfransının terrorçuluğa qarşı mübarizəyə həsr edilməsi, həmin tədbirin ABŞ-da keçirilməsi, habelə 2004-cü ildə ümumi yığıncağın Cənubi Koreyada təşkili barədə təkliflər müzakirəyə çıxarılmışdır.
Eyni zamanda, İcraiyyə Komitəsi üzvlərinin Assosiasiyanın Azərbaycandan olan fərdi üzvləri ilə görüşü olmuş, faydalı fikir və təcrübə mübadiləsi aparılmışdır. Əsası Azərbaycanda qoyulan bu ənənə müsbət qiymətləndirilmişdir.
Qonaqları Azərbaycan Respublikasının Prezidenti cənab Heydər Əliyev qəbul etmişdir. Onlar ölkəmizdə qısa müddətdə aparılan məhkəmə-hüquq islahatından məmnun qaldıqlarını, Assosiasiyasının İcraiyyə Komitəsində təmsil olunan Azərbaycanın təşkilatın inkişafına nəzərəçarpacaq töhfələr verdiyini qeyd etmişlər. Dövlətimizin başçısının razılığı ilə bu iclasın Bakıda yüksək səviyyədə təşkilinə görə dərin minnətdarlıqlarını bildirən qonaqlar ümumbəşəri sosial bəla olan terrorculuğa və transmilli cinayətkarlığa qarşı səylərin birləşdirilməsinin əhəmiyyətini vurğulamışlar.
Bölmənin digər xəbərləri
