“Beynəlxalq konfranslara tezislərin hazırlanması və göndərilməsi” – rəsədxanada astroseminar
Bakı, 3 noyabr, AZƏRTAC
Elm və Təhsil Nazirliyinin N.Tusi adına Şamaxı Astrofizika Rəsədxanasında Gənc Alim və Mütəxəssislər Şurasının növbəti astroseminarı keçirilib.
Bu barədə AZƏRTAC-a rəsədxanadan məlumat verilib.
Seminarda rəsədxananın Qalaktikalar və ulduzəmələgəlmə prosesləri şöbəsinin əməkdaşı, dosent Həmayil Adıgözəlzadə “Beynəlxalq konfranslara tezislərin hazırlanması və göndərilməsi” mövzusunda məruzə ilə çıxış edib.
H.Adıgözəlzadə beynəlxalq konfranslara tezislərin hazırlanması zamanı vacib məqamları iştirakçıların diqqətinə çatdırıb. Keyfiyyətli konfrans materialları və məqalələrin hazırlanma qaydaları, plagiat və onlara qarşı mübarizə, uğurlu tədqiqat işlərinə yazılan məqalə və konfrans materiallarının nüfuzlu jurnallarda dərc olunması mərhələləri, məqalələrə qoyulan tələblər, məqalələrin yazılması metodologiyası, məqalələri yazarkən tələblərə uyğun olaraq beynəlxalq elmi bazalardan istifadə qaydaları haqqında məlumat verib. O bildirib ki, hər bir gənc tədqiqatçının əsas göstərici meyarı onun əsərlərinin beynəlxalq nəşrlərdə çap olunması və bu əsərlərə, tədqiqat işlərinə beynəlxalq indeksləşmiş bazalarda verilən istinadların sayıdır.
Sonra mövzu ilə bağlı müzakirələr aparılıb, suallar cavablandırılıb.
Bölmənin digər xəbərləri
