Beynəlxalq Qızıl Xaç Komitəsi itkin düşmüş şəxslərlə əlaqədar media nümayəndələri üçün seminar keçirəcək
Bakı, 4 oktyabr, AZƏRTAC
Beynəlxalq Qızıl Xaç Komitəsi (BQXK) identifikasiya prosesinin humanitar aspektləri, itkin düşmüş şəxslərin talelərinin aydınlaşdırılması ilə bağlı komitənin mandatı və rolu mövzusunda iki günlük seminar keçirməyi planlaşdırır.
AZƏRTAC xəbər verir ki, seminarın məqsədi itkin düşmüş şəxslərin axtarışı, insan qalıqlarının çıxarılması və identifikasiya prosesi barədə materiallar dərc edən media nümayəndələrini bir araya gətirməkdir. Nəzəri məlumatlarla yanaşı, seminar zamanı bu sahədə praktiki simulyasiyanın keçirilməsi də nəzərdə tutulub. Tədbirdə ərazidə üzləşdikləri çətinliklərə cavab verilməsi və artan media marağı fonunda məlumatlandırmanın beynəlxalq standartlara uyğun təkmilləşdirilməsi istiqamətində müzakirələr üçün də şərait yaradılacaq.
Seminarın noyabr ayının ilk həftəsində paytaxtdan kənarda keçirilməsi nəzərdə tutulub.
Bölmənin digər xəbərləri
