BEYNƏLXALQ ŞAHMAT TURNİRİNDƏ RƏQABƏT ARTIR
Hollandiyanın Vek-an-Zeye şəhərində keçirilən mötəbər beynəlxalq şahmat turnirində liderlik uğrunda rəqabət artır. AZƏRTAC xəbər verir ki, turnir cədvəlinə başçılıq edən gənc Azərbaycan qrossmeysteri Teymur Rəcəbov son iki turda cəmi yarım xal toplayaraq, liderliyi şahmat tacı uğrunda digər namizədə - Bolqarıstan qrossmeysteri Veselin Topalova verməli olmuşdur. Hazırda həmvətənimiz 9 görüşdə 6 xal toplayan Topalovdan cəmi yarım xal geri qalır və müşahidəçilərin fikrincə, liderliyi geri qaytarmaq üçün onun bütün imkanları var. Mütəxəssislər T.Rəcəbovun öz görüşlərini yüksək əhval ruhiyyədə, kəskin hücum üslubunda aparmasını xüsusi vurğulayırlar. Onun Rusiya şahmatçısı Aleksey Şirovla görüşü əvvəlkitək turnirin ən yaxşı oyunu sayılır.
T.Rəcəbov jurnalistlərlə söhbətində bildirmişdir ki, uğurları gərgin əməyin, rəqiblərin imkanlarını əsaslı öyrənməsinin və onların yaradıcılığını təhlil etməsinin nəticəsidir. Gənc bakılı demişdir ki, şahmat oynamaq və əlbəttə, qalib gəlmək ürəyincədir. O, öz ustalığını cilalamaq və təcrübə qazanmaq yolu ilə bundan sonra da sevdiyi işlə məşğul olmaq niyyətindədir.
Bölmənin digər xəbərləri
