Beynəlxalq Türk Akademiyası ilə TÜBA arasında əməkdaşlıq perspektivləri müzakirə olunub
Bakı, 22 yanvar, AZƏRTAC
Beynəlxalq Türk Akademiyasının (BTA) prezidenti akademik Şahin Mustafayevlə Türkiyə Elmlər Akademiyasının (TÜBA) prezidenti professor Müzəffər Şəkər arasında görüş keçirilib.
BTA-dan AZƏRTAC-a bildirilib ki, görüşdə Türk Dünyası Milli Elmlər Akademiyaları Birliyinin (TDUBAB) Prezidentlər Şurasının əvvəlki iclasında qəbul edilmiş qərarların icra vəziyyəti müzakirə olunub. TDUBAB-nin 7-ci iclasında imzalanmış protokolda yer alan “Əməkdaşlıq təklifləri” və “Türkdilli dövlətlər arasında elmi tədqiqatlar üzrə əməkdaşlıq strategiya proqramı”na xüsusi diqqət yetirilib.
Bundan əlavə, Beynəlxalq Türk Akademiyası və TÜBA-nın birgə səyləri ilə ənənəvi olaraq keçirilən yay məktəbləri də müzakirə edilib.
Görüşün sonunda iki akademiya arasında davamlı səmərəli əməkdaşlığın və qarşılıqlı bilik mübadiləsinin rəmzi olaraq kitab mübadiləsi aparılıb.
Bölmənin digər xəbərləri
