Binanın fasadından yeniyetmənin başına daş parçasının düşməsi ilə bağlı prokurorluqda araşdırma aparılır
Bakı, 4 may, AZƏRTAC
Aprelin 30-da Səbail Rayon Polis İdarəsinin 41-ci polis bölməsindən 2006-cı il təvəllüdlü Şabanov Əli Mahir oğlunun üzərinə binanın fasadından daş parçasının düşməsi barədə rayon prokurorluğuna məlumat verilib.
Səbail Rayon Prokurorluğunun AZƏRTAC-a daxil olan məlumatında bildirilib ki, aparılmış araşdırmalarla Əli Şabanovun Bakı şəhəri Səbail rayonu Badamdar qəsəbəsi Rafiq İsgəndərov küçəsindəki 2 saylı beşmərtəbəli binanın yaxınlığından keçərkən başına binanın fasadından daş parçasının düşməsi, nəticədə kəllə-beyin travması və baş-beyin silkələnməsi diaqnozu ilə Dövlət Təhlükəsizliyi Xidmətinin Baş Tibb İdarəsinin reanimasiya şöbəsinə yerləşdirilməsi müəyyənləşdirilib.
Hazırda fakt üzrə Səbail Rayon Prokurorluğunda araşdırma aparılır.
Bölmənin digər xəbərləri
