“Bir daha vahid/bütöv Azərbaycan ərazisi haqqında” kitabı çapdan çıxıb
Bakı, 5 fevral, AZƏRTAC
AMEA-nın akademik Ziya Bünyadov adına Şərqşünaslıq İnstitutunda İran tarixi və iqtisadiyyatı şöbəsinin müdiri dosent Vidadi Mustafayevin “Bir daha vahid/bütöv Azərbaycan ərazisi haqqında” kitabı çapdan çıxıb.
Bu barədə AZƏRTAC-a institutdan məlumat verilib. Bildirilib ki, kitabda İranda cənubi azərbaycanlılara qarşı aparılan irqi ayrı-seçkilikdən, cənubi azərbaycanlıların şimali azərbaycanlılarla birlikdə türk xalqlarından biri olmasını, Azərbaycan toponiminin şimali Azərbaycana şamil edilməsini inkar etmək siyasətindən bəhs edilir.
Müəllif panfarsistlərin Azərbaycan xalqına qarşı mübarizənin tərkib hissəsi kimi “Azərbaycan” toponiminə qarşı 3 istiqamətdə mübarizə apardıqlarını qeyd edir: Şimali Azərbaycanın Azərbaycan adlanmasına qarşı “elmi”- ideoloji mübarizə, Azərbaycanın (Cənubi) vahid inzibati-ərazi vahidi kimi qalmasına qarşı hüquqi-inzibati mübarizə, Azərbaycan sözünün (Cənubi Azərbaycan) bir toponim kimi işlənməsinə qarşı informativ mübarizə.
Bu istiqamətlərin hər biri haqqında kitabda ayrıca bölmələrdə bəhs edilir. Bütün bunlarla yanaşı, müəllif İranda Azərbaycan toponiminə az sayda müəlliflər tərəfindən olsa da, obyektiv elmi yanaşmanın olduğunu bildirir və bu mövqedən yazılmış bir neçə məqalə haqqında bəhs edir.
Bölmənin digər xəbərləri
