Birinci Qarabağ müharibəsinin itkin şəhidi Mikayıl Əliyev Xəzər rayonunda torpağa tapşırılıb VİDEO
Bakı, 31 oktyabr, Göyçək Mahmudlu, AZƏRTAC
Birinci Qarabağ müharibəsinin itkin şəhidi Mikayıl Atababa oğlu Əliyev oktyabrın 31-də paytaxtın Xəzər rayonunun Zirə qəsəbəsində yerləşən yeni məzarlıqda dəfn olunub.
AZƏRTAC xəbər verir ki, dəfn mərasimində şəhidin ailə üzvləri, Xəzər və Nizami Rayon İcra hakimiyyətlərinin nümayəndələri, Müdafiə, Daxili İşlər, Fövqəladə Hallar nazirliklərinin, Səfərbərlik və Hərbi Xidmətə Çağırış üzrə Dövlət Xidmətinin əməkdaşları, Milli Məclisin deputatları, müharibə veteranları, şəhid ailələri və sakinlər iştirak ediblər.
İtkin şəhid yaylım atəşi və hərbi orkestrin müşayiəti ilə Dövlət Himnimizin sədaları altında torpağa tapşırılıb. Şəhidin ruhuna dualar oxunub, məzarının üzərinə əklil qoyulub, gül dəstələri düzülüb.
Tabutun büküldüyü Azərbaycanın Dövlət Bayrağı şəhidin yaxınlarına təqdim olunub.
Dəfn mərasimində çıxış edənlər Mikayılın minlərlə Azərbaycan oğulları kimi çətin gündə torpaqlarımızın müdafiəsinə qalxdığını, döyüş yoldaşları ilə birgə Xocalı sakinlərinin həyatını xilas edərkən şəhid olduğunu deyiblər. Bildirilib ki, 2020-ci ildə 44 günlük Vətən müharibəsində və 2023-cü il antiterror əməliyyatlarında əldə edilən Qələbələrdən sonra itkinlərin taleyinə aydınlıq gələcəyinə dair ümidlər yarandı. Artıq itkinlərimizlə bağlı məlumatlar əldə etmək mümkün olur. Onlar tapılaraq doğmalarına təhvil verilirlər. Digər itkinlərin də tapılacağına dair inam ifadə olunub. Hazırda şanlı Zəfərin beşinci ildönümü ərəfəsində olduğumuzu, tarixi günlər yaşadığımızı qeyd edən natiqlər şəhidlərimizin, Xocalı hadisələrinin qisasının alındığını, soyqırımı törədənlərin mühakimə olunduğunu, üçrəngli Bayrağımızın azad edilmiş ərazilərdə qürurla dalğalandığını bildiriblər. Həmçinin Qarabağda bərpa-quruculuq işlərinin aparıldığı, doğma sakinlərin öz yurd-yuvalarına qayıtdığı və şəhidlərin ruhunun rahatlıq tapdığı vurğulanıb.
Şəhidin qardaşı Zaur Əliyev qardaşının mülayim xarakterli biri olduğunu, Xocalı hadisələrindən sonra ondan xəbər tuta bilmədiyini deyib: “Mikayıl öz döyüş yoldaşları ilə birgə Xocalı soyqırımı günü – 1992-ci il fevralın 25-dən 26-na keçən gecə şəhid olub. Onlar Xocalı sakinlərini rayondan çıxarmağa çalışırmışlar. Xocalı aeroportu yolunda artilleriya atəşinə məruz qalıblar. Mikayılla birlikdə 6 nəfər şəhid olub. Lakin onların nəşlərini tapmaq mümkün olmayıb. Onların nəşinin qalıqları qazıntı işləri zamanı elə şəhid olduqları ərazidən tapılıb. Mikayılgil fevralın 27-də Xocalıdan çıxacaqdılar, nəsib olmadı. Bir günün bədəli uzun illərə dayandı. 33 ildən sonra biz onun taleyindən xəbər tutduq. Elə doğulduğu gündə də Vətən torpağına tapşırdıq”.
Şəhidin dayısı Zülfi Məlikov deyib: “Mikayıl gözümüzün qarşısında böyümüşdü. Çox sakit, mərd, tərbiyəli övlad idi. 1991-ci ildə 23 yaşında Qarabağa döyüşlərə yollanarkən anası onu yolundan döndərməyə çalışsa da, buna nail ola bilmədi. O, hər zaman deyirdi ki, Vətənin müdafiəsinə sən getmə, mən getməyim, bəs kim getsin? Son dəfə onu hərbi geyimini fəxrlə geyinib, evdən çıxanda görmüşdük. Bir il yarım Xocalı istiqamətində “Aqilin dəstəsi” adlandırılan dəstədə döyüşdü. On-on iki nəfərdən ibarət dəstə idi. Xocalı hadisələrindən sonra Mikayıldan xəbər ala bilmədik. 1992-ci il fevralın 27-də Ağdama yollandıq, faciənin dəhşətini gözlərimizlə gördük. Meyitlərin arasında Mikayılı axtardıq, lakin bu, nəticəsiz qaldı. Qismətdə Mikayılı öz doğum günündə torpağa tapşırmaq var imiş. Allah bütün şəhidlərimizə rəhmət eləsin, qazilərimizə cansağlığı, şəfa diləyirəm. Qəhrəman oğullar uzun illərdən sonra bizə qürurlu yaşamağı nəsib etdilər”.
Mikayılın qardaşı ilə uşaqlıq dostu olduqlarını deyən Əməkdar artist Rəfael İsgəndərov belə deyib: “Mikayıl böyük qardaş kimi bizə nəzarət edir, nadinclik etməyə imkan vermirdi. 33 ildir gözümüz yolda idi. Çox şükür ki, xəbəri gəldi”.
Qeyd edək ki, Birinci Qarabağ müharibəsi şəhidi Mikayıl Əliyev 1968-ci il oktyabrın 31-də paytaxtın Nizami rayonunda anadan olub. O, 1992-ci il fevralın 26-da Xocalı istiqamətində gedən döyüşlərdə itkin düşmüşdü.
Mikayıl Əliyev Birinci Qarabağ müharibəsində itkin düşmüş hesab edilən və şəxsiyyətləri müəyyənləşdirilərək bu gün dəfn olunan beş şəhiddən biridir.
Bölmənin digər xəbərləri
