Bitkiçilik istiqaməti üzrə düzgün peşə seçimi və iş imkanları mövzusunda müzakirələr aparılıb
Bakı, 12 iyun, AZƏRTAC
İyunun 12-də Peşə Təhsili üzrə Dövlət Agentliyinin təşkilatçılığı ilə bitkiçilik istiqaməti üzrə düzgün peşə seçimi və iş imkanları mövzusunda vebinar təşkil edilib.
AZƏRTAC xəbər verir ki, peşə seçimi mərhələsində olan gənclərin maarifləndirilməsi məqsədilə keçirilən vebinarda bitkiçilik istiqamətində görülən işlər, mövcud bazarın tələbi və peşə təhsil müəssisələrində təhsil alanlar üçün iş imkanlarından bəhs olunub.
Onlayn seminarda Peşə Təhsili üzrə Dövlət Agentliyinin Peşəyönümü və işəgötürənlərlə əməkdaşlıq şöbəsinin müdiri Zamin Bədirxanov diqqətə çatdırıb ki, Azərbaycanın müxtəlif bölgələrində fəaliyyət göstərən peşə təhsil mərkəzlərində kənd təsərrüfatı, xüsusilə bitkiçilik istiqamətində ixtisaslara geniş yer ayrılıb. Peşə Təhsili üzrə Strateji Yol Xəritəsində 4 prioritet istiqamət müəyyənləşdirilib ki, bunlardan biri də kənd təsərrüfatıdır. Lakin bu gün problem məsələlərdən biri peşə təhsilinin nüfuzunun aşağı olmasıdır. Bu istiqamətdə mühüm addımlar atılmalıdır. Peşə seçimi mərhələsində olan gəclər arasında peşəyönümü istiqamətində maarifləndirmə işləri aparılmalıdır. Təklif olunan peşələrin karyera imkanları haqqında məlumatlandırma işi gücləndirilməlidir.
Zamin Bədirxanov vurğulayıb ki, peşə seçərkən əmək bazarının tələbləri dəqiqliklə araşdırılmalıdır. İşəgötürənlərlə əməkdaşlıq çərçivəsində son dövrlərdə kənd təsərrüfatı ixtisası üzrə məzun olan gənclərin işə qəbul olunma faizi xeyli yüksəlib.
Meyvəçilik və Çayçılıq Elmi-Tədqiqat İnstitutunun (MÇETİ) direktor müavini Vahid Əliyev bildirib ki, müəssisə təkcə becərmə texnologiyasının hazırlanması ilə məşğul olmur. Burada yüksəkixtisaslı kadr hazırlığı sahəsində də işlər görür. İnstitut əyani və qiyabi doktorantura təhsili verir. Elmi müəssisə, eyni zamanda, Lənkəran Dövlət Peşə Təhsil Mərkəzi ilə əməkdaşlıq edir. Bu da mərkəzin məzunlarına kənd təsərrüfatı sahəsində daha dərin biliklər əldə etməyə, elmi tədqiqatlar aparmağa imkan verir.
Azərbaycan Respublikasının Kənd Təsərrüfatı Nazirliyinin “AMAL” Milli Proqramının rəhbəri Elvin Nəbiyev layihə haqqında ətraflı məlumat verib. Diqqətə çatdırıb ki, proqramın məqsədi bölgələrdə kənd təsərrüfatı sahəsində peşə təhsili proqramı hazırlamaqdır. Eyni zamanda, gənc fermerlərin formalaşmasına dəstək vermək və onların gələcəyin innovativ fermerlərinə çevrilməsi üçün baza yaratmaqdır.
Lənkəran Dövlət Peşə Təhsil Mərkəzinin direktoru Afər Kərimov məlumat verib ki, mərkəz ilə MÇETİ arasında kənd təsərrüfatı sahəsində təcrübəli mütəxəssislərin hazırlanmasına xidmət edən əməkdaşlıq müqaviləsi imzalanıb. “AMAL” layihəsinin dəstəyi ilə Lənkəran Dövlət Peşə Təhsil Mərkəzinin tələbələri MÇETİ-nin Lənkəran filialının ərazisində 10 hektar sitrus bağlarının salınmasında iştirak edib və müqaviləyə əsasən bağlardan yığılan məhsullardan gələn gəlirlərin bir hissəsi onların arasında bölünəcək.
Peşə Təhsili üzrə Dövlət Agentliyinin “Facebook” və “YouTube” səhifələrində canlı yayımlanan vebinarda izləyicilərin sualları da cavablandırılıb.
Bölmənin digər xəbərləri
