BMU-nun elmi jurnalı beynəlxalq reytinqdə Q2 səviyyəsinə yüksəlib
Bakı, 17 aprel, AZƏRTAC
Bakı Mühəndislik Universitetinin (BMU) Riyaziyyat və kompüter elmləri kafedrasının müdiri riyaziyyat elmləri doktoru Rakib Əfəndiyevin baş redaktoru olduğu elmi jurnal (“Journal of Contemporary and Applied Mathematics” (https://journalcam.com/) beynəlxalq reytinq sistemində mühüm nailiyyət əldə edib.
BMU-dan AZƏRTAC-a bildirilib ki, jurnal Scopus və SCImago indekslərinin kvartil sıralamasında növbəti böyük uğura imza ataraq Q4-dən Q2 səviyyəsinə yüksəlib. Bu, BMU-nun elmi tədqiqatlara verdiyi önəmin, o cümlədən nəşrin beynəlxalq miqyasda nüfuzunun, sitat indeksinin və akademik təsir gücünün əhəmiyyətli dərəcədə artmasının real nəticəsidir.
Məlum olduğu kimi, elmi jurnallar kvartil sisteminə əsasən, Q1-dən Q4-ə qədər dərəcələndirilir. Q2 kateqoriyası yüksəkkeyfiyyətli jurnalların yer aldığı önəmli pillədir.
Əldə olunan mühüm irəliləyiş jurnaldakı məqalələrin digər tədqiqatçılar tərəfindən daha çox sitat gətirildiyini və nəşrin beynəlxalq elmi ictimaiyyətdə daha geniş tanınma səviyyəsi qazandığını göstərməklə yanaşı, bütövlükdə Azərbaycan riyaziyyat məktəbinin və elmi ictimaiyyətinin beynəlxalq səviyyədə tanınmasının bariz nümunəsidir. Bu nailiyyət ölkədə elmi nəşrlərin keyfiyyətinin artdığını və qlobal akademik sistemə inteqrasiyanın gücləndiyini ortaya qoyur.
Vurğulamaq vacibdir ki, son illər jurnalın redaksiya siyasəti beynəlxalq standartlara uyğunlaşdırılıb, məqalələrin seçimi və rəy prosesi daha da təkmilləşdirilib. Jurnalın rəhbər heyətinin strateji yanaşması, yüksək akademik tələbləri və beynəlxalq əməkdaşlıqlara açıq siyasəti nəticəsində nəşr qısa müddət ərzində ciddi keyfiyyət irəliləyişi nümayiş etdirib. Xüsusilə nüfuzlu tədqiqatçıların jurnala cəlb olunması, məqalələrin elmi səviyyəsinin yüksəldilməsi və indekslənmə bazalarında aktivliyin artırılması bu uğurun əsas faktorları sırasındadır.
Bölmənin digər xəbərləri
