Bölgələrdə Xocalı faciəsi qurbanlarının xatirəsi anılıb
Kürdəmir, 26 fevral, AZƏRTAC
Kürdəmirdəki Heydər Əliyev Mərkəzində Xocalı faciəsinin 24-cü ildönümü ilə əlaqədar ümumrayon tədbiri keçirilib.
AZƏRTAC xəbər verir ki, iştirakçılar ilk öncə mərkəzin foyesində təşkil olunan məktəblilərin əl işlərindən ibarət rəsmlərin nümayiş etdirildiyi “Xocalı soyqırımı uşaqların gözü ilə” adlı sərgiyə, habelə kitab sərgisinə baxıblar.
Sonra faciənin dəhşətlərini əks etdirən “Qarabağdır Azərbaycan” adlı sənədli film göstərilib, şagirdlərin ifasında “Xocalı səsləyir bizi” mövzusunda ədəbi-bədii kompozisiya nümayiş olunub.
Həmin gün Kürdəmirdə məskunlaşan Xocalı sakinləri ilə görüş keçirilib. Görüşdə rayon icra hakimiyyətinin başçısı Ceyhun Cəfərov erməni qəsbkarlarının Xocalıda törətdikləri vəhşiliklərdən danışıb. İcra hakimiyyətinin başçısı soydaşlarımıza qarşı qəddarcasına törədilən dəhşətli qətliama məhz ümummilli lider Heydər Əliyevin qətiyyəti sayəsində hüquqi-siyasi qiymət verildiyini bildirib. Habelə, vurğulanıb ki, Prezident İlham Əliyevin uğurlu siyasəti nəticəsində artıq dünya ölkələri, nüfuzlu beynəlxalq təşkilatlar soyqırımını tanımaqdadırlar. Onlar Azərbaycan xalqı ilə həmrəy olduqlarını bildirir, törədilən dəhşətli qətliamı şiddətlə qınayır və qəti şəkildə pisləyirlər.
Xocalı sakini Elmar Şahverənov görüşdə o günlərin dəhşətli xatirələrindən danışıb, bu gün xocalılılara göstərilən dövlət qayğısına görə minnətdarlığını bildirib.
X X X
Xocalı soyqırımının 24-cü ildönümü Ağsuda ziyalıların, gənclərin, ictimaiyyət nümayəndələrinin iştirakı ilə qeyd olunub.
AZƏRTAC xəbər verir ki, Heydər Əliyev Mərkəzində keçirilən tədbirin iştirakçıları əvvəlcə XX əsrin ən dəhşətli faciələrindən olan Xocalı qətliamına həsr olunan sənədli filmə baxıblar.
Rayon icra hakimiyyətinin başçısı Ənvər Seyidəliyev və digər çıxış edənlər Xocalı soyqırımının öz ağlasığmaz qəddarlığı və qeyri-insani cəza üsulları ilə bəşər tarixində bir vəhşilik aktı olduğunu diqqətə çatdırıblar.
Çıxışlarda bu qanın yerdə qalmayacağı bildirilib, Xocalı soyqırımının dünyada tanıdılması istiqamətində dövlətimizin başçısının rəhbərliyi ilə aparılan məqsədyönlü və ardıcıl siyasət təqdir olunub.
X X X
Azərbaycan xalqının tarixinə qanla yazılan Xocalı soyqırımının 24-cü ildönümü Şamaxıda da izdihamlı mərasimlə qeyd olunub.
AZƏRTAC xəbər verir ki, rayon rəhbərliyi, hüquq mühafizə orqanlarının, idarə, müəssisə və təşkilatların kollektivləri, ictimaiyyətin nümayəndələri Şamaxıdakı Soyqırımı abidəsini ziyarət edib, faciə qurbanlarının xatirəsini ehtiramla anıblar.
Şamaxı şəhər İncəsənət Təhsili Mərkəzində davam etdirilən tədbirdə iştirakçılar Xocalı faciəsinə həsr olunan rəsm sərgisi ilə tanış olublar.
Sonra soyqırımı dəhşətlərini əks etdirən “Xocalı qətliamı” adlı sənədli filmə baxış keçirilib.
Tədbir məktəblilərin ifasında “26 fevral - Xocalı faciəsi uşaqların gözü ilə” mövzusunda ədəbi-bədii kompozisiya ilə davam etdirilib.
X X X
Xocalı faciəsinin 24-cü ildönümü İsmayıllıda da qeyd olunub.
AZƏRTAC xəbər verir ki, fevralın 26-da səhər saat 9-dan başlayaraq İsmayıllı şəhərinin mərkəzi meydandakı monitorda Xocalı soyqırımına həsr olunan sənədli filmlər, erməni vəhşiliklərini əks etdirən səhnələr nümayiş etdirilib.
Rayon rəhbərliyi, ağsaqqallar, ictimaiyyət nümayəndələri əllərində faciə səbəbkarlarını lənətləyən, gəncləri mübarizəyə səsləyən plakatlar tutaraq, mərkəzi meydandan “Ana harayı” abidəsinədək yürüş ediblər.
Yürüş iştirakçıları “Ana harayı” abidəsinin və Qarabağ müharibəsində şəhid olan Vətən övladlarının adları yazılan lövhələrin önünə gül dəstələri, əklillər qoyublar.
Şəhər 6 saylı tam orta məktəbin şagirdlərinin iştirakı ilə fləşmob keçirilib.
Sonra İsmayıllı şəhər mədəniyyət mərkəzində Xocalı faciəsinə həsr olunan ədəbi-bədii kompozisiyaya və “Xoca” filminə baxış olub.
X X X
Xocalı soyqırımının 24-cü ildönümü ilə əlaqədar Zərdabda anım mərasimi keçirilib.
AZƏRTAC xəbər verir ki, mərasim iştirakçıları fevralın 26-da səhər saatlarında Şəhidlərin Xatirə Parkını ziyarət edib, Xocalı soyqırımına həsr olunan məktəblilərin əl işlərindən ibarət rəsm sərgisinə, divar qəzetlərinə baxış keçiriblər.
Anım mərasimində çıxış edən rayon icra hakimiyyətinin başçısı Lütvəli Babayev Xocalıda baş verənlərin Azərbaycan xalqına qarşı növbəti, dəhşətli soyqırımı aktı olduğunu diqqətə çatdırıb.
Tədbirdə Xocalı faciəsinə həsr olunan ədəbi-bədii kompozisiya nümayiş etdirilib.
Həmin gün rayonun bütün məscidlərində Xocalı soyqırımı qurbanlarının xatirəsinə dini mərasimlər keçirilib, dualar oxunub.
Bölmənin digər xəbərləri
