“BÖYÜK İPƏK YOLU” BEYNƏLXALQ BOKS TURNİRİ BAŞA ÇATMIŞDIR
AZƏRTAC xəbər verir ki, martın 31-də Bakı İdman Sarayında keçirilən “Boyük İpək Yolu” beynəlxalq boks turniri başa çatmışdır.
11 çəki dərəcəsi üzrə keçirilmiş yarışda bokusçularımız 4 qızıl medal qazanmışlar. Samir Məmmədov (51 kq), Rəhim Nəcəfov (54 kq), Fərhad Acalov (64 kq) və Elçin Əlizadə (91kq) fəxri kürsünün ən yüksək pilləsinə qalxmışlar.
Bundan əlavə, Rusiya, Gürcüstan Fillipin və Qazaxıstan idmançıları da müxtəlif çəki dərəcələrində turnirin qızıl medallarını qazanmışlar.
Ümumi komanda hesabında Azərbaycan bokusçuları 1-ci, Rusiya və Gürcüstan yığmaları isə 2-3-cü yerləri tutmuşlar.
Yarışda Azərbaycan idmançıları ilə yanaşı, Türkiyə, Qazaxıstan, Rusiya, İran, İsrail, Fillipin, Gürcüstan, Misir, Bolqarıstan və Afrikanın 95 boksçusu mübarizə aparmışdır.
Azərbaycan Boks Federasiyasının prezidenti Ağacan Abıyev yarışda idmançılarımızın uğurla çıxış etdiyini bildirmişdir. O, ilk dəfə keçirilən bu turnirin ənənə halını alacağına və bir neçə ildən sonra Olimpiya oyunlarına lisenziya qazanmaq hüququ verəcəyinə əmin olduğunu söyləmişdir.
Xatırladaq ki, əvvəllər Beynəlxalq Həvəskar Boks Assosiasiyasının (AİBA) sabiq prezidenti Ənvər Çoudrinin şərəfinə keçirilən yarış bu ildən “Böyük İpək Yolu” adlandırılmışdır.
Bölmənin digər xəbərləri
