“Böyük Qayıdış” Gənclər Təşkilatı Gənclər Günü münasibətilə bir sıra tədbirlər keçirib
Bakı, 2 fevral, AZƏRTAC
2 Fevral - Azərbaycan Gəncləri Gününə həsr olunmuş silsilə tədbirlər çərçivəsində “Böyük Qayıdış” Gənclər Təşkilatının İdarə heyətinin üzvlərinin, Vətən müharibəsi qazilərinin və üzv gənclərin iştirakı ilə Fəxri Xiyabanda Ulu Öndər Heydər Əliyevin məzarı ziyarət edilib.
Təşkilatdan AZƏRTAC-a bildirilib ki, gənclər dahi şəxsiyyətin əziz xatirəsini ehtiramla yad edərək, məzarı önünə gül dəstələri qoyublar.
Gənclər Fondunun dəstəyi ilə “Böyük Qayıdış” Gənclər Təşkilatı tərəfindən Gənclər Gününə həsr olunmuş silsilə tədbirlər çərçivəsində təşkilatın fəaliyyətində aktivlik göstərən üzv gənclərin, Vətən müharibəsi qazilərinin, Qayıdış Könüllülərinin və Təcrübə Proqramının iştirakçılarının təltifetmə mərasimi keçirilib.
Mərasimdə Gənclər Fondunun icraçı direktor vəzifəsini icra edən Qədir Xəlilov, Milli Məclisin Gənclər və idman komitəsinin üzvləri, deputatlar Vüqar İskəndərov və Naqif Həmzəyev, “Böyük Qayıdış” Gənclər Təşkilatının sədri Nail Şükürov və Vətən müharibəsi qazisi, ehtiyatda olan mayor Elşad Təhməzov çıxış edərək, hər il ölkəmizdə təntənəli şəkildə Azərbaycan Gəncləri Günü kimi qeyd edilən 2 fevral tarixinin uzaqgörən siyasətçi, dahi lider Heydər Əliyevin adı ilə bağlı olduğunu diqqətə çatdırıblar. Qeyd olunub ki, əsası Ulu Öndər tərəfindən qoyulan gənclər siyasətinin hədəflərindən biri gənclərin cəmiyyət həyatının bütün sahələrində aktiv iştirakını təmin etməkdir. Ümummilli Liderin layiqli siyasi varisi və davamçısı Prezident, Müzəffər Ali Baş Komandan İlham Əliyev hazırda gənclər siyasətini qətiyyətli və uğurlu şəkildə icra edir. Bu uğurlu siyasətin nəticəsi olaraq, Azərbaycan gəncliyi Vətən müharibəsi dövründə istər ön cəbhədə, istər arxa cəbhədə, istərsə də informasiya müharibəsində aktiv şəkildə iştirak edərək gücünü göstərib.
Həmçinin o da vurğulanıb ki, bu gün ərazi bütövlüyü və suverenliyi tam bərpa olunmuş ölkəmizdə gənclər siyasəti mahiyyət və keyfiyyətcə yeni mərhələyə qədəm qoyub. Qalib xalqın gəncləri bu gün cəmiyyətimizin ən fəal hissəsi kimi ölkənin sosial-iqtisadi və ictimai-siyasi həyatında yaxından iştirak edirlər. İşğaldan azad olunmuş ərazilərimizin dirçəldilməsində, əzəli torpaqlarımızda həyatın yenidən bərpa olunmasında və “Böyük Qayıdış” prosesində gənclərin aktiv iştirakı ilə bağlı gözləntilər də böyükdür. Bu xüsusda, “Böyük Qayıdış” Gənclər Təşkilatının fəaliyyətində aktiv iştirak edən gənclərin təşəbbüslərini yüksək qiymətləndirən çıxışçılar, bu nəcib dəstəyə görə onlara təşəkkürlərini bildiriblər.
Təltiflərdən sonra tədbir yaradıcı gənclərin təqdimatında bədii hissə ilə davam edib.
Tədbirlər planına uyğun olaraq, “Qayıdış Könüllüləri” Proqramının Füzuli könüllüləri qrupunun iştirakı ilə Füzuli şəhərində yerləşən Mirzə Uluqbəy adına 1 nömrəli tam orta məktəbdə master-klaslar keçirilib. Fəaliyyətlərin keçirilməsində əsas məqsəd Füzuli şəhərində məskunlaşan yeniyetmə və gənclərin asudə vaxtlarının səmərəli təşkil edilməsi olub. 30 nəfər yeniyetmə və gəncin iştirakı ilə baş tutan master-klaslar zamanı iştirakçılar kətan çanta və kətan tablo üzərində rəsm çəkərək, həmçinin dibçək boyayaraq əyləncəli vaxt keçiriblər.
Sonda iştirak edən hər bir gəncə hazırladıqları əl işləri təqdim edilib.
Bölmənin digər xəbərləri
