Britaniya Gürcüstan hökumətinə dəstəyini azaldır
London, 10 dekabr, AZƏRTAC
Böyük Britaniyanın xarici işlər naziri Devid Lemmi Gürcüstan hökumətinə dəstək və hökumətlə əməkdaşlığın azaldılacağını elan edib.
AZƏRTAC xəbər verir ki, bəyanatda Gürcüstan hakimiyyəti tərəfindən nümayişçilərə və jurnalistlərə qarşı zorakılığın qəbuledilməz olduğu qeyd edilib.
“Bu hərəkətlər Gürcüstanın beynəlxalq nüfuzuna xələl gətirir və ölkənin konstitusiyasında təsbit olunmuş Avropanın gələcəyinə sadiqliyinə ziddir. Bu, dayandırılmalıdır”, - deyə Devid Lemmi bəyanatda qeyd edib.
Nazir bildirib ki, baş verən hadisələr fonunda Böyük Britaniya Gürcüstan hökumətinə bütün proqram dəstəyini dərhal dayandıracaq, müdafiə sahəsində əməkdaşlığı və “Gürcü Arzusu” hökumətinin nümayəndələri ilə əlaqələri məhdudlaşdıracaq.
Qeyd olunub ki, Böyük Britaniya Gürcüstan xalqının öz ölkəsinin gələcəyini seçmək hüququnu dəstəkləməkdə davam edəcək.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
