BSU-da fransız rəssamın Xocalı soyqırımını əks etdirən sərgisi keçirilib
Bakı, 26 fevral, AZƏRTAC
Bakı Slavyan Universitetində (BSU) Xocalı faciəsinin 24-cü ildönümünə həsr edilmiş silsilə tədbirlər keçirilib. Universitetin Viktor Hüqo adına Fransız dili və mədəniyyəti mərkəzinin təşkilatçılığı ilə reallaşdırılan anma mərasimində fransız rəssamı Reno Vinsent Baltzingerin Xocalı soyqırımına həsr olunmuş əsərləri nümayiş etdirilib.
Universitetdən AZƏRTAC-a bildiriblər ki, əvvəlcə faciə qurbanlarının xatirəsi bir dəqiqəlik sükutla anılıb.
Tədbirdə çıxış edən Reno Vintes Baltzinger sərgi ilə bağlı fikirlərini bölüşüb. Rəssamın sözlərinə görə, onun Xocalı soyqırımına dair rəsm əsərlərinin ərsəyə gəlməsinə Fransanın Azərbaycandakı səfirliyində mədəniyyət işləri üzrə müşavir kimi çalışmış mərhum qardaşının vəsiyyəti səbəb olub.
BSU-nun filologiya və jurnalistika fakültəsinin dekanı Zenfira Vəliyeva Xocalı faciəsinin ağır nəticələrindən, Azərbaycan xalqının taleyində buraxdığı dərin yaralardan söz açıb, gəncləri daim Vətənə xidmətə hazır olmağa səsləyib.
Sərgidə faciənin dəhşətlərini əks etdirən 21 rəsm əsəri nümayiş olunub, Xocalı hadisələrinə həsr edilən bədii kompozisiya göstərilib.
Bölmənin digər xəbərləri
