Bu gün Azərbaycanın əldə etdiyi bir çox uğurlar Ulu Öndərin adı ilə bağlıdır
Zaqatala, 10 may, AZƏRTAC
Milli şüurun oyanışı, müstəqil dövlətimizin ən yeni tarixi məhz XX əsrin ikinci yarısı və XXI əsrin əvvəllərində Azərbaycan tarixində silinməz iz qoymuş dövlət xadimi, Ulu Öndər Heydər Əliyevin adı ilə bağlıdır. Ulu Öndərin zəngin siyasi fəaliyyəti ölkəmizin hərtərəfli inkişafı prosesinə təkan verərək, onu daimi yüksəliş yoluna çıxarıb. Zaman keçdikcə dahi rəhbər, fenomen şəxsiyyət Heydər Əliyevin böyüklüyünü, Azərbaycanın intibahı, xalqımızın xoş gələcəyi üçün əvəzsiz xidmətlərini, zəhmətini daha çox hiss edirik. İllər, qərinələr, əsrlər keçəcək, Ümummilli Liderin bizlərə qoyduğu müqəddəs miras, zəngin irs müstəqil dövlətimizin, xalqımızın haqq yoluna daim nur saçacaq.
AZƏRTAC-ın bölgə müxbiri xəbər verir ki, bu fikirlər Ulu Öndərin anadan olmasının 103-cü ildönümü münasibətilə mayın 10-da Zaqatala rayon Heydər Əliyev Mərkəzində keçirilən tədbirdə səsləndirilib.
Rayon rəhbərliyi və ictimaiyyətin nümayəndələri əvvəlcə Ulu Öndərin adını daşıyan istirahət parkında dahi rəhbərin abidə kompleksini ziyarət edib, önünə gül dəstələri düzüblər. Sonra tədbir iştirakçıları parkda Ulu Öndər Heydər Əliyevin həyat və fəaliyyətindən bəhs edən foto və kitab sərgisinə baxıblar.
Tədbirin əvvəlində Dövlət Himni səsləndirilib, Ulu Öndərin və şəhidlərin xatirəsi bir dəqiqəlik sükutla yad edilib. Dahi rəhbərə həsr olunan film nümayiş olunub.
Tədbirdə rayon icra hakimiyyəti başçısı Mübariz Əhmədzadənin “Əzəmətli və unudulmaz lider Heydər Əliyev” mövzusunda məruzəsi dinlənilib. Qeyd olunub ki, Ulu Öndər Heydər Əliyevin siyasi uzaqgörənliyi, liderlik bacarığı və xalqına bağlılığı müasir Azərbaycan dövlətçiliyinin əsasını təşkil edib. Bu gün Azərbaycanın əldə etdiyi bir çox uğurlar Ulu Öndərin adı ilə bağlıdır. Fəaliyyətinin amalı, qayəsi doğma Azərbaycanın parlaq gələcəyi olan Ulu Öndər Heydər Əliyev ölkəmizə rəhbərliyinin birinci mərhələsində sovet dövrünün bütün ideoloji-siyasi maneələrinə sinə gərərək, ictimai şüurlardakı qorxunu aradan qaldıraraq müasir tariximizin ən şanlı və parlaq salnaməsini yazıb.
Vurğulanıb ki, Ümummilli Lider Heydər Əliyevin ikinci dəfə siyasi hakimiyyətə qayıtması xalqımızın çoxəsrlik tarixinə taleyüklü möhtəşəm siyasi hadisə kimi daxil olub, uğurlu dövlət quruculuğu prosesinin əsası qoyulub.
Tədbirdə Milli Məclisin deputatı Asif Əsgərov, YAP Zaqatala rayon təşkilatının sədri Fərid Ramazanov, rayon Məhkəməsinin hakimi Zərifə Məmmədova, rayon Müharibə, Əmək və Silahlı Qüvvələr Veteranları təşkilatının sədri İbrahim İbrahimov, rayon Heydər Əliyev Mərkəzinin direktoru Famil Rəhimov çıxış edərək, Ümummilli Lider Heydər Əliyevin xalqımız qarşısındakı xidmətlərindən bəhs ediblər. Çıxışlarda müasir Azərbaycan tarixinin yaradıcısı olan Heydər Əliyevin xalqımızın qürur mənbəyi, tarixi bir şəxsiyyət olaraq yaddaşlara əbədi həkk olunduğu xüsusi vurğulanıb.
Çıxışlardan sonra YAP sıralarına yeni daxil olan üzvlərə vəsiqələr təqdim edilib.
Ulu Öndərin anadan olmasının 103-cü ildönümü münasibətilə həmin gün Heydər Əliyev adına istirahət parkında konsert proqramı təşkil olunub.
Bölmənin digər xəbərləri
