BUDAPEŞTDƏ AZƏRBAYCAN MUĞAM USTALARININ KONSERTİ BÖYÜK UĞURLA KEÇMİŞDİR

04.11.2006 [16:18]
Çap et
A⁺ A^-

Azərbaycanın Macarıstandakı səfirliyindən AZƏRTAC-ın müxbirinə bildirmişlər ki, noyabrın 3-də Budapeştin nüfuzlu konsert salonlarından birində - “Palace of Art”da Azərbaycan muğam üçlüyünün konserti olmuşdur. Tarzən Mircavad Cəfərovun və kamançaçalan İsmayıl Həmidovun müşayiəti ilə çıxış edən tanınmış muğam ifaçısı, xalq artisti Səkinə İsmayılova dinləyiciləri məftun etmişdir.

Xatırladaq ki, Macarıstandakı diplomatik nümayəndəliyimiz bu konsertin təşkili üçün böyük hazırlıq işi aparmışdır. Səfirlik təşkilatçılara müraciətlə Azərbaycan artistlərini qastrola dəvət etmək təklifini irəli sürmüşdü. İfaçılarımızın kifayət qədər sanballı siyahısından məhz Səkinə İsmayılova seçilmiş və ona konsertdə iştirak etmək təklif olunmuşdur. Bu faktın özü, habelə konsertin tam anşlaqla və sürəkli alqış sədaları altında keçməsi göstərir ki, Avropada Azərbaycan incəsənətinə rəğbət var və o, çox böyük maraqla qarşılanır.

Konsertdə dinləyicilərə Azərbaycan səfirliyinin hazırladığı və muğam sənətinin tarixi haqqında məlumat verən bukletlər paylanmışdır.