BUXARESTDƏ “DİALOQ VƏ TƏRƏFDAŞLIQ NAMİNƏ” QARA DƏNİZ FORUMU İŞƏ BAŞLAMIŞDIR
AZƏRTAC-ın xüsusi müxbiri xəbər verir ki, iyunun 5-də Buxarestdə, Rumıniya parlamentinin binasında “Dialoq və əməkdaşlıq naminə” Qara dəniz forumu işə başlamışdır.
Azərbaycan Prezidenti İlham Əliyev forumda iştirak etmişdir.
Rumıniyanın təşəbbüsü ilə təşkil olunmuş forumun səhər keçirilən açılış mərasimində Rumıniyanın xarici işlər naziri Mixay Rezvan Unquryanu çıxış edərək, gündəlik barədə məlumat verdi.
Sonra forumda “Avropa və qlobal kontekstdə geniş Qara dəniz regionu” mövzusunda müzakirələr aparıldı. Çıxışların əksəriyyətində keçmiş sovet respublikalarında mövcud münaqişələrin həllinin zəruriliyi xüsusi vurğulandı, bunun qloballaşan dünya, eləcə də Avropa üçün, regional inkişaf üçün maneə törətdiyi bildirildi. Eyni zamanda, iqtisadi, siyasi, mədəni əməkdaşlığın daha da genişləndirilməsi istiqamətində səylərin birləşdirilməsinin Qara dəniz region ölkələri üçün də əhəmiyyətli olduğu vurğulandı.
Fasilədən sonra forum öz işini Azərbaycan, Rumıniya, Gürcüstan, Ukrayna, Moldova və Ermənistanın dövlət başçılarının, eləcə də Türkiyəni, Bolqarıstanı və 10-dan çox digər ölkəni təmsil edən nümayəndələrin iştirakı ilə davam etdirdi.
“Qara dəniz forumu: yeni fikirlər, öhdəliklər və vasitələr” mövzusunda davam edən iclasda Rumıniya Prezidenti Trayan Besesku çıxış edərək, ali qonaqları və digər iştirakçıları salamladı, Qara dəniz regionuna beynəlxalq ictimaiyyətin diqqətinin artırılması baxımından bu forumun çox faydalı olacağını söylədi. O bildirdi ki, bu tədbir regional əməkdaşlığı, həmrəyliyi, şəffaflığı və demokratiyanı təlqin etmək üçün açıq dialoq platformasını təklif edir. Forumun məqsədi Qara dəniz regionunda sülhün və təhlükəsizliyin təmin olunmasına töhfə verməkdir. Bu məqsədlə foruma altı ölkənin dövlət başçısı, eləcə də Avropa Birliyinin, Avropa Şurasının, NATO-nun və digər beynəlxalq təşkilatların rəhbərləri və 10-dan çox ölkənin nümayəndələri dəvət olunmuşlar. Bu tədbirə 400-dən çox qeyri-hökumət təşkilatı da böyük maraq göstərir və 350-dən çox yerli və xarici kütləvi informasya vasitələrinin təmsilçiləri onun işini işıqlandırır.
Azərbaycan Prezidenti İlham Əliyev forumda nitq söylədi. Dövlətimizin başçısı ölkəmizin iqtisadi inkişafından, beynəlxalq layihələrdə iştirakından, Avropa strukturlarına inteqrasiya sahəsində görülən işlərdən danışdı. Beynəlxalq əhəmiyyət daşıyan Bakı-Tbilisi-Ceyhan, Bakı-Tbilisi-Ərzurum neft və qaz kəmərləri layihələrinin həyata keçirilməsinin dünya üçün, Avropa, o cümlədən Qara dəniz regionu ölkələri üçün böyük əhəmiyyət daşıdığını, regional nəqliyyat infrastrukturunun yaradılmasının zəruriliyini vurğuladı. Prezident İlham Əliyev Ermənistan-Azərbaycan, Dağlıq Qarabağ münaqişəsinə də toxunaraq, Azərbaycanın ədalətli mövqeyini bir daha açıqladı və dedi ki, ölkəmizin ərazisinin 20 faizi Ermənistan tərəfindən işğal edilmiş və etnik təmizləmə siyasəti nəticəsində bir milyondan çox azərbaycanlı qaçqın və köçkünə çevrilmişdir. Bu məsələ beynəlxalq hüquq normaları əsasında həllini tapmalıdır.
Azərbaycan Prezidenti forumun əhəmiyyətindən də danışdı, səmərəli müzakirələrin faydalı olduğunu söylədi və tədbirin təşkilatçılarına təşəkkürünü bildirdi.
Forumda Ermənistan, Gürcüstan, Moldova və Ukrayna prezidentləri, habelə Bolqarıstan Baş nazirinin müavini, xarici işlər naziri İvaylo Kalfin, Türkiyənin dövlət naziri Bəşir Atalay və digər nümayəndələr çıxış etdilər. Forumu yüksək qiymətləndirən natiqlər regionun inkişafı üçün bir çox prinsipial məsələlərin həllinin zəruriliyini vurğuladılar.
Yekun olaraq “Dialoq və tərəfdaşlıq naminə” Qara dəniz forumunun Birgə Bəyannaməsi qəbul edildi. Dövlət başçıları və digər iştirakçılar birgə xatirə şəkli çəkdirdilər.
Bölmənin digər xəbərləri
