CEB Türkiyə səhiyyə sektorunun bərpasına kredit ayırıb
Strasburq, 25 aprel, AZƏRTAC
Dağıdıcı zəlzələlərdən sonra Türkiyənin səhiyyə sektoruna dəstək üçün kredit verilməsi məqsədilə Avropa Şurasının İnkişaf Bankı (CEB) İdarə Heyətinin toplantısı keçirilib.
AZƏRTAC xəbər verir ki, CEB-in İdarə Heyəti dağıdıcı zəlzələlərdən ziyan çəkmiş Türkiyə Respublikasının səhiyyə sektorunun bərpasına dəstək üçün krediti təsdiqləyib. İdarə Heyətini toplantısında, həmçinin Bərpa Fondunun yaradılması barədə qərar qəbul olunub.
2023-cü il fevralın 6-da Türkiyədə baş vermiş dağıdıcı zəlzələlər xəstəxana və tibb müəssisələrinə ciddi ziyan vurub. CEB-in Türkiyə Respublikasına dəstək üçün ayırdığı 250 milyon avroluq krediti hökumətin əsas ehtiyacları üçün istifadə ediləcək. Qısa müddətdə səhiyyə xidmətləri və orta müddətli perspektivdə davamlı sağlamlıq infrastrukturu yenidən qurulacaq. Səhiyyə xidmətlərinin bərpasına dəstək, eyni zamanda zəlzələdən zərər çəkmiş, 14 milyon insanın yaşadığı və əsas kənd təsərrüfatı mərkəzi olan regiondan potensial miqrasiya axınının qarşısını almaq məqsədi daşıyır.
CEB-in direktoru Karlo Montiçelli (Carlo Monticelli) martın 20-də Avropa İttifaqının Donor Konfransında Türkiyə və Suriya üçün 500 milyon avro kredit ayıracaqlarını elan etmişdi. Haqqında söhbət gedən kredit həmin öhdəliyin bir hissəsidir.
Şəhla Ağalarova
AZƏRTAC-ın xüsusi müxbiri
Strasburq
Bölmənin digər xəbərləri
