CƏBRAYIL RAYON İCRA HAKİMİYYƏTİNİN BAŞÇISI MAHMUD QULİYEVİN ÇIXIŞI
-Möhtərəm cənab Prezident!
Qaçqınların və məcburi köçkünlərin problemini özünün bir nömrəli problemi hesab etmiş ümummilli liderimizin siyasi kursunun layiqli davamçısı kimi Siz də bu problemi ölkənin prioritet problemi elan etdiyinizə, bu problemə daim diqqət göstərdiyinizə, bizimlə ikinci dəfə geniş tərkibdə belə tədbir keçirdiyinizə görə, respublikanın 58 şəhər və rayonunda məskunlaşmış 62 min cəbrayıllı məcburi köçkün adından Sizə dərin minnətdarlığımızı bildiririk.
Möhtərəm cənab Prezident!
Ümummilli liderimizin müvafiq Fərmanına əsasən Biləsuvar rayonu ərazisində salınmış yeni qəsəbələrdə yaşayan 12 min nəfər məcburi köçkün 2003-cü ilin oktyabrında qəsəbələrin açılışı mərasimində Sizinlə görüşü dərin minnətdarlıqla xatırlayır.
Sizə hesabat verərək bildirmək istəyirəm ki, bu qəsəbələrin açılışından sonra rayonun əksər idarələrinin fəaliyyətinin qismən bərpa edilməsi və bir neçə idarənin yaradılması hesabına 731 nəfər daimi işlə təmin edilmiş, 2560 ailənin məşğulluğu üçün hər bir ailəyə kənd təsərrüfatı ilə məşğul olmaq məqsədi ilə 0,12 hektar həyətyanı, 0,59 hektar pay torpağı verilmiş və bununla da 5500 nəfərdən çox əhali kənd təsərrüfatı məhsulları becərilməsi üçün mövsümi işlərə cəlb edilmişdir.
2005-ci ilin iyununda Sizin yanınızda keçirilən müşavirədə məcburi köçkünlərin problemləri ilə bağlı qaldırılan məsələlər qısa müddətdə öz müsbət həllini tapmışdır.
Sizin müvafiq Sərəncamınızla təsdiq edilmiş Dövlət Proqramında məcburi köçkünlərin mövcud sosial problemlərinin həlli üçün hər cür şərait yaranmışdır.
Yeni qəsəbələrdə ümummilli liderimizin adını daşıyan mədəniyyət və istirahət parkı salınmış, ulu öndərin əzəmətli büstü ucaldılmış və bu park bütün əhalimizin mənalı istirahət yerinə çevrilmişdir.
Möhtərəm cənab Prezident!
Bu gün çox böyük fəxrlə deyə bilərik ki, 2003-cü il oktyabrın 1-də yeni salınmış qəsəbələrdə cəbrayıllı seçicilərlə görüşünüz zamanı verdiyiniz vədləri layiqincə yerinə yetirmisiniz. Bildirmişdiniz ki, prezidentlik dövründə bir dənə də çadır düşərgəsi qalmayacaqdır. Saatlı, Sabirabad çadır düşərgələrində və İmişli dəmir yolundakı yük vaqonlarında məskunlaşmış məcburi köçkünlər üçün 1858 ailəlik beş qəsəbədə tikinti işləri başa çatdırılmış, son çadır düşərgələrindən köçürülmə prosesinə başlanılmışdır. Memarı olduğunuz yeni qəsəbələrə bu günlərdə köçürülən məcburi köçkünlər Sizinlə görüşü və xeyir-duanızı səbirsizliklə gözləyirlər.
Cəbrayıllılar həmişə dövlətçiliyə öz sədaqətləri ilə seçilmişlər. Onlar Sizin apardığınız daxili və xarici siyasəti ürəkdən bəyənir, dəstəkləyir və həmişə Sizinlədir. Onlar Ermənistan-Azərbaycan, Dağlıq Qarabağ münaqişəsinin həlli ilə bağlı apardığınız sülh danışıqlarını yüksək qiymətləndirir, Sizin sərt bəyanatlarınızı yaxşı başa düşür, apardığınız siyasətin tam qələbə çalacağına inanırlar.
Əsası ümummilli liderimiz tərəfindən qoyulan və Sizin rəhbərliyinizlə uğurla davam etdirilən işlərin nəticəsidir ki, qəsəbələrə yolu düşən və özlərini müxalifət adlandıran qüvvələr də ölkədə bütün sahələrdə görülmüş işlərə qara yaxa bilmirlər. Görülən müsbət işləri görməmək üçün yalnız kor olmaq lazımdır.
Möhtərəm cənab Prezident!
İcazənizlə, Sizin diqqətinizə çatdırardım ki, yığcam salınan 4560 ailəlik yeni qəsəbələrdə 25 mindən yuxarı cəbrayıllı məcburi köçkünün məskunlaşması ilə əlaqədar həmin qəsəbələrdə bütün idarə və müəssisələr kimi, rayon elektrik şəbəkə müəssisəsinin də fəaliyyətinin bərpa edilməsinə ehtiyac vardır.
Mən məcburi köçkünlərin bir arzusunu da bildirmək istəyirəm ki, 2003-cü il oktyabrın 1-də seçkiqabağı ilk görüşü cəbrayıllı məcburi köçkünlərlə keçirdiniz və bu çox uğurlu başlanğıc oldu. Əhalimiz xahiş edir ki, bu ənənəyə uyğun olaraq 2008-ci il prezident seçkiləri zamanı da ilk görüşünüzü məhz yeni qəsəbədə yaşayan əhalimizlə görüşdən başlayasınız.
Diqqətinizə görə çox sağ olun.
Bölmənin digər xəbərləri
