Cəlilabadda aşkarlanan artefakt qədim dəfnetmə adəti ilə bağlı yeni məlumatları üzə çıxarıb FOTO VİDEO
Cəlilabad, 31 avqust, İlkin Adıyev, AZƏRTAC
Cəlilabad rayonunda mövcud olan Paşatəpə qədim yaşayış məskənində aparılan arxeoloji qazıntılar zamanı Azərbaycan tarixinə dair yeni maddi-mədəniyyət nümunələri aşkar edilib. Çoxsaylı tarixi tapıntılar arasındakı insan skeletlərinin qalıqları qədim dəfnetmə adəti ilə bağlı yeni məlumatları üzə çıxarıb.
AZƏRTAC-ın bölgə müxbiri xəbər verir ki, Cəlilabad rayonunun Cəfərxanlı kəndində yerləşən artefaktda bir il öncə də arxeoloji qazıntılar aparılıb. Burada üzə çıxan nümunələr ərazidə fasiləsiz həyatın olması ilə bağlı ilkin təsəvvürlər yaradıb. Son qazıntılar zamanı da gözləntilər özünü doğruldub.
Belə ki, ərazidə qədim insanların məşğuliyyəti ilə bağlı Neolit dövrünə aid saxsıdan, sümükdən və dəvəgözü daşından hazırlanmış çoxsaylı məişət, bəzək əşyaları üzə çıxıb.
AMEA-nın Arxeologiya, Etnoqrafiya və Antropologiya İnstitutunun aparıcı elmi işçisi Vəfa Mahmudova bildirib ki, burada hədsiz sayda saxsı məmulatlar aşkarlanıb: “Burada tapılan saxsı məmulatlarında müxtəlif bəzəklərə rast gəlinir. Bəzəklər Paşatəpə qədim yaşayış məskənində yaşayan insanların estetik dünya görüşünün yüksək səviyyədə olduğunu göstərir. Ondan başqa sümükdən, çaxmaq daşından və külli miqdarda dəvəgözü daşından əmək alətləri qeydə alınıb”.
Arxeoloqun sözlərinə görə, tapıntılar arasında qədim dəfn adətləri ilə bağlı nümunələrə də rast gəlinir. Üz-üzə dəfn edilmiş iki insan sümüyünün qalıqları burada qoşa dəfnetmə adətlərinin mövcudluğundan xəbər verir. Həmçinin qəbir qalıqları ilə paralel ərazidə isə həmin şəxslərin məşğuliyyəti ilə bağlı unikal istehsal sobası da aşkarlanıb.
Tarixçi Elçin Hüseynov qeyd edib ki, aparılan araşdırmalar Cəlilabadın tarixinin çox zəngin olduğunu bir daha göstərir: “Bura qədim insanların yaşayış yeri olub. Tapılan eksponatlardan da görürük ki, - əmək alətlərinin zənginliyi, müxtəlif dəfnetmə adətləri və fiqurlar, - qədim insanlar burada uzun müddət yaşayıblar”.
Mütəxəssislərin sözlərinə görə, Paşatəpə artefaktının araşdırılması Qafqaz arxeologiyasında erkən əkinçilik mədəniyyəti və sənətkarlıqla bağlı yenilikləri üzə çıxara bilər.
Bölmənin digər xəbərləri
