“CƏNUB MİRVARİSİ-2009” III FUTBOL ÇEMPİONATINDA FİNAL MƏRHƏLƏSİNİN OYUNLARI KEÇİRİLMİŞDİR
Cəlilabad, 6 oktyabr (AZƏRTAC). “Pal-süd” MMC-nin baş sponsorluğu və Cənub Regional Futbol Federasiyasının təşkilatçılığı ilə 1996-1997-ci il təvəllüdlü yeniyetmələr arasında keçirilən “Cənub mirvarisi-2009” III Futbol Çempionatının final mərhələsinin növbəti oyunları keçirilmişdir.
Cəlilabad şəhərində Lənkəranın “Xəzər-92” komandası ilə Neftçalanın “UGİM” komandaları arasındakı görüş 2:2 hesabı ilə nəticələnmişdir. Cəlilabadın “UGİM” komandası Masallının “Bələdiyyə” komandasına 2:0 hesabı ilə qalib gəlmişdir.
Final mərhələsinin ikinci oyununda “Xəzər-92” 3:1 hesabı ilə “Bələdiyyə”ni, Cəlilabadın “UGİM” komandası isə 1:0 hesabı ilə Neftçalanın “UGİM” komandasını məğlub etmişdir.
Yarış cədvəlinə iki oyundan 6 xal toplayan Cəlilabadın “UGİM” komandası başçılıq edir. “Xəzər-92”-nin 4, Neftçalanın “UGİM” komandasının 1 xalı vardır.
Növbəti oyunlar oktyabrın 11-də Cəlilabad şəhərində keçiriləcəkdir. Həmin gün “Xəzər-92” Cəlilabadın “UGİM”, “Bələdiyyə” isə Neftçalanın “UGİM” komandaları ilə görüşəcəklər.
Bölmənin digər xəbərləri
