Cənubi Koreyada qəzaya uğrayan hərbi təyyarənin 4 heyət üzvünün meyiti tapılıb
Pekin, 29 may, AZƏRTAC
Cənubi Koreyanın Phohan şəhəri yaxınlığında qəzaya uğrayan Hərbi Dəniz Qüvvələrinə məxsus “P-3” tipli patrul təyyarəsində olan bütün heyət üzvlərinin – 4 nəfərin meyiti tapılıb.
AZƏRTAC xəbər verir ki, bu barədə Cənubi Koreyanın Hərbi Dəniz Qüvvələrinin qərargahı məlumat yayıb. Bildirilib ki, təyyarə yerli vaxtla saat 13:43-də (Bakı vaxtı ilə 08:43) Phohan şəhərindəki hərbi bazadan təlim uçuşu məqsədilə havaya qalxıb. Təxminən 6 dəqiqə sonra hələlik bilinməyən səbəbdən hava gəmisi dağlıq ərazidə qəzaya uğrayıb.
Hadisə yerində tapılan meyitlərin şəxsiyyətinin müəyyənləşdirilməsi üçün müvafiq ekspertiza aparılacaq.
Qeyd edək ki, Cənubi Koreyanın Hərbi Dəniz Qüvvələrinin inventarında 16 ədəd “P-3” tipli patrul təyyarəsi mövcuddur. Bu, ölkədə bu tip təyyarələrlə bağlı qeydə alınan ilk qəza hadisəsidir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
