Çernobılda yanğına görə Ukraynanın havasında müxtəlif yanma məhsullarının səviyyəsinin artması müşahidə olunur
Kiyev, 15 aprel, AZƏRTAC
Ukraynanın Səhiyyə naziri Maksim Stepanov bildirib ki, Çernobılda yanğına görə havada müxtəlif yanma məhsullarının səviyyəsinin artması müşahidə olunur.
AZƏRTAC xəbər verir ki, nazir bunu brifinqdə bəyan edib.
M. Stepanovun sözlərinə görə, Səhiyyə Nazirliyi bütün insanlara, xüsusən ağciyərlərin xroniki xəstəliklərindən və ya ürək-damar xəstəliklərindən əziyyət çəkən şəxslərə səhər saatlarında küçəyə çıxmağı məhdudlaşdırmağı tövsiyə edir, çünki həmin saatlarda havada bu hissəciklərin konsentrasiyası daha yüksək olur.
Nazir onu da vurğulayıb ki, radiasiya fonu norma həddindədir, ona görə bu tərəfdən təhlükə yoxdur.
Xatırladaq ki, Ukraynanın kimsəsiz Çernobıl zonasında aprelin 4-də başlanmış və 10 gün davam etmiş yanğın fövqəladə xidmətlərin işçilərinin səylərinin və yağışın sayəsində söndürülüb. Ukrayna Dövlət fövqəladə hallar xidmətlərinin son məlumatlarına görə, ayrı-ayrı közərmə mərkəzlərinin söndürülməsi davam edir.
Rüstəm Məmmədov
Kiyev
Bölmənin digər xəbərləri
