Praqa, 29 may, AZƏRTAC

28 May – Müstəqillik Günü münasibətilə Azərbaycanın Çex Respublikasındakı səfirliyi tərəfindən rəsmi qəbul keçirilib.

AZƏRTAC xəbər verir ki, qəbulda Çex Respublikasının Baş naziri Andrey Babiş, Parlamentin Deputatlar Palatasının Sədri Tomio Okamura, Çexiya Hökumət Ofisinin rəhbəri xanım Tünde Barta, Baş nazirin milli təhlükəsizlik üzrə müşaviri Hinek Kmoniçek başda olmaqla, Çexiya dövlət qurumlarının çoxsaylı nümayəndələri, Parlamentin Deputatlar Palatasının Azərbaycan–Çexiya Dostluq Qrupunun üzvləri, Çexiyada akkreditə olunmuş diplomatik korpus rəhbərləri, habelə media təmsilçiləri və Azərbaycanlı diaspor fəalları iştirak ediblər.

Azərbaycan və Çexiyanın dövlət himnləri səsləndirildikdən sonra səfir Yaşar Əliyev açılış nitqi ilə çıxış edib. 1918-ci ildə yaradılmış və müsəlman Şərqinin ilk demokratik dövləti olan Azərbaycan Xalq Cümhuriyyətinin cəmi 23 ay fəaliyyət göstərməsinə baxmayaraq, xalqımızın milli kimliyinin möhkəmləndirilməsi və müasir dövlətçilik ənənələrinin formalaşdırılmasında mühüm tarixi rol oynadığını bildirən səfir, bu irsin Azərbaycan xalqının 1991-ci ildə dövlət müstəqilliyini yenidən bərpa etməsi və dövlətçilik ənənələrini qoruyub saxlaması üçün mühüm zəmin yaratdığını qeyd edib.

Azərbaycanın müstəqilliyini bərpa etdikdən sonra böyük inkişaf və transformasiya yolu keçdiyini vurğulayan səfir, ölkəmizin hazırda Cənubi Qafqazın aparıcı iqtisadi gücü olmaqla yanaşı, regional bağlantılar, enerji təhlükəsizliyi və iqtisadi əməkdaşlıq sahələrində etibarlı beynəlxalq tərəfdaş kimi çıxış etdiyini, həmçinin Orta Dəhliz layihəsi vasitəsilə dialoq, ticarət və regional əməkdaşlığın inkişafında mühüm rol oynadığını bildirib.

Ölkəmizin beynəlxalq tədbirlərə ev sahibliyi edən nüfuzlu ölkəyə çevrildiyini qeyd edən səfir, COP29-un uğurlu təşkilindən sonra Azərbaycanın bu ilin mayında davamlı şəhər inkişafı, təhlükəsiz və dayanıqlı yaşayış mühiti, iqlim dəyişiklikləri, əlçatan mənzil təminatı, inklüziv inkişaf və regional əməkdaşlıq kimi mühüm məsələlərin müzakirə olunduğu və 186 ölkədən dövlət və hökumət nümayəndələrinin iştirak etdiyi BMT-nin Dünya Urbanizasiya Forumunun 13-cü Sessiyasına (WUF13) da müvəffəqiyyətlə ev sahibliyi etdiyini vurğulayıb.

Hazırda Azərbaycan–Çexiya ikitərəfli münasibətlərinin tarixi inkişaf mərhələsi yaşadığını bildirən səfir, bir ay əvvəl Çexiya Baş naziri Andrey Babişin 50-dən çox aparıcı Çex şirkətinin nümayəndələri ilə birlikdə Azərbaycana rəsmi səfər etdiyini və səfərin Baş nazirin Avropa İttifaqından kənara ilk rəsmi səfəri olmasının Çexiyanın ikitərəfli münasibətlərimizə verdiyi xüsusi əhəmiyyəti sübut etdiyini vurğulayıb.

Bununla yanaşı, səfər çərçivəsində təşkil olunmuş Azərbaycan–Çexiya Biznes Forumunda iki ölkə arasında iqtisadi əməkdaşlığın genişləndirilməsi, ənənəvi sahələrlə yanaşı, qarşılıqlı maraq doğuran yeni istiqamətlər üzrə əməkdaşlıq imkanlarının da müzakirə edildiyini qeyd edən səfir, Azərbaycan Respublikasının Prezidenti İlham Əliyevin forumdakı çıxışına istinad edərək, “Hazırkı mövcud yüksək səviyyəli siyasi təmasların iki ölkə liderləri tərəfindən biznes dairələrinə ikitərəfli ticarət və investisiya əlaqələrinin daha da inkişaf etdirilməsi ilə bağlı aydın siyasi mesaj” olduğunu bildirib.

Rəsmi qəbulda fəxri qonaq qismində çıxış edən Çex Respublikasının Baş naziri Andrey Babiş Çexiyanın Azərbaycan ilə strateji tərəfdaşlıq münasibətlərini çox yüksək qiymətləndirdiyini qeyd edərək, bu əlaqələrin müxtəlif sahələrdə uğurla genişləndirilməsindən məmnunluğunu ifadə edib.

İqtisadi əməkdaşlıq əlaqələrinə xüsusilə toxunan Baş nazir, ticarət və investisiya əlaqələrinin ildən-ilə inkişaf etdiyini, Çex şirkətlərinin Azərbaycandakı geniş imkanlardan yararlanaraq azərbaycanlı tərəfdaşlarla əməkdaşlıqda maraqlı olduqlarını qeyd edib.

Enerji sahəsində əməkdaşlığın münasibətlərimizin əsasını təşkil etdiyini bildirən A. Babiş, Azərbaycanın Çexiyanın ən böyük xam neft təchizatçısı olduğunu və bunun yalnız iqtisadi maraq deyil, eyni zamanda qarşılıqlı etimad və etibarlı tərəfdaşlığın göstəricisi olduğunu bildirib. O, həmçinin enerji təhlükəsizliyinin qlobal gündəmdə xüsusi əhəmiyyət kəsb etdiyi bir dövrdə Azərbaycan kimi etibarlı tərəfdaşa sahib olmağın Çexiya üçün çox böyük önəm daşıdığını vurğulayıb.

Eyni zamanda, Azərbaycanın Avropanın enerji təhlükəsizliyinin möhkəmləndirilməsi və enerji mənbələrinin şaxələndirilməsindəki mühüm rolundan bəhs edən Baş nazir, Xəzər regionunu Avropa bazarları ilə birləşdirən təşəbbüslərin strateji əhəmiyyət daşıdığını və bu kontekstdə Azərbaycanı əsas tərəfdaşlardan biri hesab etdiklərini qeyd edib.

Azərbaycana son səfərini və səfər zamanı Azərbaycan Respublikasının Prezidenti İlham Əliyevlə aparılmış açıq və konstruktiv müzakirələri, eləcə də cari ilin yanvarında Davos Dünya İqtisadi Forumu çərçivəsində iki lider arasında baş tutan görüşü məmnunluqla xatırlayan A. Babiş, bu tip müntəzəm dialoqun münasibətlərimizin yalnız formal xarakter daşımadığını, əksinə, praktiki nəticələrə yönəlmiş fəal əməkdaşlıq formatında inkişaf etməsinin göstəricisi olduğunu qeyd edərək, bu təmasların qarşılıqlı anlaşmanın möhkəmlənməsinə və Çexiya–Azərbaycan iqtisadi əməkdaşlığının daha da genişləndirilməsinə yeni imkanlar yaradacağına əminliyini ifadə edib.

Karlovı Varı hava limanının uçuş-enmə zolağının genişləndirilməsi üzərində çalışdıqlarını və bu addımın azərbaycanlı turistlərin Çexiyanın məşhur kurort şəhərlərinə səfərlərinin artmasına töhfə verəcəyini bildirən Baş nazir, bununla yanaşı, Budvar məhsullarının Azərbaycanda istehsalı istiqamətində əməkdaşlığı dəstəklədiklərini və bu sahədə artıq ilkin danışıqların başladığını da qeyd edib.

Azərbaycanın sürətli inkişafı, yüksək əzmi və gələcəyə olan inamının onda böyük təəssürat yaratdığını bildirən A.Babiş, səfər zamanı yalnız iqtisadi əməkdaşlıq və qarşılıqlı maraq doğuran məsələlər üzrə məhsuldar müzakirələrin deyil, eyni zamanda iki xalq arasında mövcud olan səmimi münasibətlər və qarşılıqlı etimada da şahid olduğunu qeyd edib. O, həmçinin Azərbaycan xalqının qonaqpərvərliyi və səmimiyyətinin onda dərin təəssüratlar yaratdığını xüsusilə vurğulayıb.

Nitqinin sonunda Baş nazir geniş potensiala malik ikitərəfli əlaqələrimizin qarşılıqlı etimad, konstruktiv dialoq və praktiki əməkdaşlıq ruhunda daha da inkişaf edəcəyinə əminliyini ifadə edib.

Tədbirdə həmçinin Çexiya Parlamentinin Deputatlar Palatasının sədri Tomio Okamura da çıxış edib.

Çexiya və Azərbaycan arasında uzun illər qarşılıqlı hörmət və ortaq iqtisadi maraqlara əsaslanan praqmatik münasibətlərin mövcud olduğunu bildirən T. Okamura, Azərbaycanın son illərdə təkcə Qafqazın deyil, həmçinin Avropa dövlətlərinin əsas tərəfdaşlarından birinə çevrildiyini qeyd edib. Enerji sahəsində əməkdaşlığımızı yüksək qiymətləndirən sədr, Azərbaycanın bu gün Çexiyanın enerji təhlükəsizliyi və strateji resurslarının şaxələndirilməsi istiqamətində mühüm tərəfdaşı olduğunu bildirib.

T. Okamura enerji ilə yanaşı, ticarət, nəqliyyat, investisiya, mədəniyyət və xalqlararası əlaqələr kimi digər sahələrdə də münasibətlərin gələcək inkişafına inamını ifadə edib.

O, çıxışının sonunda Cənubi Qafqaz regionunda sabitliyin və sülhün möhkəmləndirilməsinə yönəlmiş diplomatik səyləri alqışladığını bildirib.

Ziyafət zamanı Azərbaycan Mədəniyyət Evinin rəhbəri Leyla Begimin kuratorluğu ilə Müstəqillik Gününə həsr olunmuş xüsusi sərgi-kompozisiya təqdim olunub. Sərgidə nümayiş olunan və azərbaycanlı rəssamlar Vəfa Aşumova və Heyran Mustafazadənin müəllifi olduqları, Azərbaycan mədəniyyətinin zənginliyini əks etdirən gəlinciklər, rəsmlər və digər simvolik sənət nümunələri qonaqlar tərəfindən böyük maraqla qarşılanıb.