Çexiyada seçicilərin yaş həddi azaldıla bilər
Praqa, 29 mart, AZƏRTAC
Çexiyada seçicilərin yaş həddinin 18-dən 16-ya endirilməsi istisna olunmur.
AZƏRTAC xəbər verir ki, ölkənin yeni seçilən Prezidenti Petr Pavel bu addımın atılmasını dəstəkləyir. Dövlət başçısı hesab edir ki, gənclər ölkədəki vəziyyət barədə kifayət qədər təsəvvürə malikdirlər və bu səbəbdən seçki prosesinə təhlükə yaratmırlar. Bu barədə Prezident Petr Pavel bu gün Moraviya-Sileziya diyarının gimnaziyalarından birində tələbələrlə aparılan diskussiyalarda bəyan edib. Gənclərdən biri 16 yaşdan başlayaraq səs verməyin mümkünlüyü barədə Prezidentə sual ünvanlayıb. Prezident cavabında bildirib ki, son 4 il ərzində o, bütün ölkə üzrə yuxarı sinif şagirdləri ilə bir sıra söhbətlər aparıb və onların əksəriyyəti bu məsələ ilə maraqlanır.
Qeyd edək ki, seçicilərin yaş həddinin 16-ya endirilməsi bir sıra başqa ölkələrdə, xüsusən də AFR-də nəzərdən keçirilən mövzudur. Almaniya Bundestaqının üzvləri artıq qərara alıblar ki, yaşı 16 və daha yuxarı olan şəxslər Avropa Parlamentinə seçkilərdə səs verə bilərlər. Danimarka və Lüksemburqun qanunvericilik orqanlarının təmsilçilərində də analoji təsəvvür mövcuddur.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
