ÇİN 2008-Cİ İL OLİMPİADASINA 7 MİLYON BİLET SATACAQ
Biletlərin qiyməti 30 yuandan (3,8 dollar) 5 min yuanadək (638 dollar) müəyyən edilmişdir. Pekində bu idman bayramına ən bahalı biletlər Afina Olimpiadası biletlərindən yarıbayarı ucuz olacaqdır. Adi Çin vətəndaşının ala bilməsi üçün biletlərin əksəriyyəti münasib qiymətə - 100 yuana (12,7 dollar) satılacaqdır. 2008-ci il avqustun 8-də Olimpiadanın təntənəli açılış mərasiminə biletin qiyməti 5 min yuan, bağlanış mərasiminə isə 150 yuandan 3 min yuanadək (19 və 382 dollar) olacaqdır.
Pekin Oyunlarının təşkilatçıları demişlər: “Çin inkişaf etməkdə olan ölkədir və vətəndaşlarımızın orta gəliri əvvəlki iki yay Olimpiadasının keçirildiyi Sidney və ya Afina sakinlərinin gəlirindən azdır”. Biletlərin 14 faizi Çin tələbələri üçün ayrılacaqdır. Satışa göndərilən bütün biletlərin yarısını Çin vətəndaşları ala biləcəklər, qalanları isə Olimpiadanın sponsorları, Beynəlxalq Olimpiya Komitəsinin, milli olimpiya komitələrinin, müxtəlif idman federasiyalarının nümayəndələri və əcnəbi azarkeşlər üçün nəzərdə tutulmuşdur.
Bölmənin digər xəbərləri
