Çində Azərbaycan dili ixtisası üzrə magistraturaya ilk tələbə qəbulu aparılıb
Pekin, 29 sentyabr, AZƏRTAC
Çinin nüfuzlu ali təhsil müəssisələrindən olan Pekin Xarici Dillər Universitetində (PXDU) Azərbaycan dili ixtisası üzrə magistratura səviyyəsini ilk tələbə qəbulu həyata keçirilib.
AZƏRTAC xəbər verir ki, bununla da universitetdə Azərbaycan dilinin tədrisi bakalavriat səviyyəsindən magistratura səviyyəsinə yüksəldilərək yeni inkişaf mərhələsinə qədəm qoyub. Magistraturaya qəbul imtahanı yazılı imtahan və müsahibə olmaqla iki mərhələdə təşkil edilib. PXDU-nun Azərbaycan dili ixtisasının üçüncü kursunda təhsil alan 2 əlaçı tələbə qəbul imtahanlarından uğurla keçərək Azərbaycan dili ixtisası üzrə magistratura təhsili almaq hüququ qazanıb. Onlar 2027-ci ilin sentyabr ayından etibarən universitetin Azərbaycan dili kafedrasının müdiri filologiya üzrə fəlsəfə doktoru Aqşin Əliyevin elmi rəhbərliyi altında magistraturada təhsillərini davam etdirəcəklər.
Qeyd edək ki, Azərbaycan dili ixtisası üzrə magistratura proqramına qəbul üçün namizədlərin Azərbaycan dilini yüksək səviyyədə bilmələri ilə yanaşı, elmi-tədqiqat bacarıqları da nəzərə alınır. Üçillik magistratura proqramında Azərbaycan dili və mədəniyyəti ilə bağlı fənlərlə yanaşı, çincə-azərbaycanca tərcümə təlimləri də əhatə olunur. Proqram çərçivəsində tələbələrin elmi-tədqiqat məqsədilə Azərbaycanda müəyyən müddət akademik fəaliyyət göstərməsi və dil mühitində araşdırmalar aparması da nəzərdə tutulur.
PXDU-nun Azərbaycan dilinin magistratura səviyyəsində tədrisi ixtisasın yalnız tədris istiqamətində deyil, elmi-tədqiqat sahəsində də inkişafı üçün yeni imkanlar yaradır. 2016-cı ildə PXDU-da Aqşin Əliyev tərəfindən Azərbaycan dili kafedrasının təşkil olunması və 2018-ci ildə Azərbaycan dili ixtisasına ilk bakalavr qəbulunun həyata keçirilməsi ilə Çində Azərbaycan dili yalnız tədris olunan xarici dil kimi deyil, eyni zamanda, tədqiq olunan dil kimi də yeni inkişaf mərhələsinə qədəm qoyub. Bununla yanaşı, Azərbaycan dili, dilçilik, tərcüməşünaslıq və azərbaycanşünaslıq istiqamətlərində yerli ixtisaslı kadrların hazırlanması məqsədilə davamlı və sistemli iş aparılır. Magistratura səviyyəsinə ilk qəbulun həyata keçirilməsi isə bu prosesin daha da inkişaf etdirilməsinə, elmi-tədqiqat potensialının genişləndirilməsinə və Çində Azərbaycan dili üzrə yerli mütəxəssislərin hazırlanmasına mühüm töhfə verəcək. Magistratura proqramının təşkili gələcəkdə Azərbaycan dili ixtisası üzrə doktoranturaya qəbulun həyata keçirilməsi üçün də zəmin yaradır.
Aqşin Əliyevin sözlərinə görə, magistraturaya qəbulun başlaması PXDU-da Azərbaycan dili ixtisasının institusional inkişafında mühüm mərhələdir. Onun fikrincə, magistratura səviyyəsində təhsilin təşkili Azərbaycan dilinin Çində daha geniş akademik və elmi mühitə daxil olmasına, gənc tədqiqatçıların Azərbaycan dili və mədəniyyəti üzrə araşdırmalara cəlb edilməsinə, eləcə də Azərbaycanla Çin arasında elmi və humanitar əlaqələrin daha da genişlənməsinə şərait yaradacaq.
PXDU-da Azərbaycan dili ixtisasına magistratura səviyyəsində tələbə qəbulu hər il həyata keçiriləcək. Proqrama yalnız Çin vətəndaşlarının deyil, müvafiq tələblərə cavab verən azərbaycanlı və digər xarici tələbələrin də müraciət etməsi mümkündür. PXDU-da Azərbaycan dili ixtisası üzrə magistraturaya ilk qəbulun həyata keçirilməsi Azərbaycan və Çin arasında humanitar və akademik əlaqələrin inkişafında yeni səhifəni açmaqla yanaşı, Çində azərbaycanşünaslıq elminin inkişafında mühüm mərhələnin əsasını qoymuş olur.
Qeyd edək ki, Çinin dövlət qurumları, xüsusən də Xarici İşlər Nazirliyi üçün kadrlar hazırlayan PXDU-da Azərbaycan dili kafedrası 2016-cı ildə yaradılıb. İlkin mərhələdə Azərbaycan dili üçüncü dil kimi tədris olunsa da, Çinin Təhsil Nazirliyinin qərarına əsasən, 2018-ci ildə ümumrespublika imtahanı əsasında Azərbaycan dili ixtisasına qəbul aparılıb və 9 tələbə dörd il ərzində Azərbaycan dilini öyrənərək Çinin ilk azərbaycanşünas kadrları olub. Onların hamısı magistratura təhsilini bitirərək müxtəlif sahələrdə çalışır. 2023-cü ildə yenidən Azərbaycan dili ixtisasına qəbul keçirilib. Hazırda 8 tələbə bakalavriat səviyyəsi üzrə təhsil alır. PXDU Heydər Əliyev Fondu, Azərbaycan Milli Elmlər Akademiyası, Bakı Dövlət Universiteti, Azərbaycan Dövlət İqtisad Universiteti (UNEC), Azərbaycan Dövlət İnformasiya Agentliyi (AZƏRTAC), Xəzər Universiteti və digər qurumlarla sıx əməkdaşlıq edir.
Bölmənin digər xəbərləri
