Çində fişəng fabrikindəki partlayışda ölənlərin sayı 37-yə çatıb
Pekin, 8 may, AZƏRTAC
Çinin Hunan əyalətində mayın 4-də fişəng fabrikində baş verən partlayış nəticəsində ölənlərin sayı 37-yə çatıb.
AZƏRTAC əyalət hökumətinin məlumatına istinadla xəbər verir ki, hadisə nəticəsində ən azı bir nəfər itkin düşüb, 51 nəfər xəsarət alıb. Yaralılardan 5-nin vəziyyəti ağırdır. Hadisə yerində axtarış-xilasetmə işləri böyük ölçüdə tamamlanıb.
Qeyd edək ki, mayın 4-də yerli vaxtla saat 16:43-də Çanşa şəhərinin tabeliyindəki Liuyan prefekturasında fişəng fabrikində güclü partlayış baş verib. Hadisənin baş verdiyi yerin 2 barıt anbarının yaxınlığında yerləşməsinin yeni partlayışlara səbəb ola biləcəyi ehtimalı ilə ərazidəki sakinlər təxliyə edilib. Polis hadisə ilə əlaqədar 8 nəfəri saxlayıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
