Hazırda Azərbaycanın hərbi-texniki əməkdaşlığı çox geniş coğrafiyanı əhatə edir - ŞƏRH
Bakı, 7 may, AZƏRTAC
Azərbaycanın qabaqcıl xarici dövlətlərlə hərbi-texniki sahədə əməkdaşlığı genişlənməkdədir. Hərbi-texniki əməkdaşlıq ümumiyyətlə çox həssas sahə olub, siyasi, təhlükəsizlik, iqtisadi və texnoloji aspektləri özündə birləşdirir. Müstəqilliyinin ilk günlərindən ağır hərbi münaqişə ilə üzləşmiş Azərbaycan üçün ordu quruculuğu işində xarici dövlətlərlə hərbi-texniki əməkdaşlıq ən ümdə istiqamətlərdən biri idi. SSRİ-nin dağılması zamanı hərbi texnika ədalətsiz şəkildə bölüşdürülmüşdü. O dövrdə mövcud olan müdafiə sənayesi müəssisələrimizin keçmiş SSRİ-nin nəhəng müdafiə sənayesi kompleksinin tərkib hissəsi kimi istehsal etdiyi məhsullar isə ölkəmizin müdafiə ehtiyaclarına tam uyğun deyildi. Yeni müəssisələrin yaradılması vaxt, böyük həcmdə maliyyə investisiyaları və elmi-texnoloji potensial tələb etdiyindən, bu məsələni qısa müddətdə tam həll etmək mümkün deyildi.
Belə bir vəziyyət Azərbaycanı xarici dövlətlərdən silah, texnika və sursat idxalı məsələsində asılı vəziyyətə salmışdı. Azərbaycan uzun müddət ehtiyac duyduğu silah, sursat və texnikanı xaricdən almaqda ciddi siyasi məhdudiyyətlərlə üzləşirdi. Çox sevindirici haldır ki, hazırda xarici dövlətlərin Azərbaycana hərbi təyinatlı məhsullar satması istiqamətindəki məhdudiyyətlər demək olar ki, aradan qalxıb, Azərbaycanın özü isə yaratdığı müasir və güclü müdafiə sənayesi ilə bu sahədə beynəlxalq bazarda özünə layiqli yer tutub.
Bu sözləri AZƏRTAC-a açıqlamasında Milli Məclisin deputatı Qaya Məmmədov deyib.
O bildirib ki, bu sahədə məhdudiyyətlərin aradan qalxması, şübhəsiz, ölkə rəhbərliyinin onilliklər ərzində səbirlə həyata keçirdiyi məqsədyönlü və uzaqgörən siyasət sayəsində mümkün olub. Həyata keçirilən təkmil xarici siyasət kursu nəticəsində hərbi-texniki əməkdaşlıq sahəsində bizim üçün maraqlı olan dövlətlərlə etibarlı siyasi münasibətlər yaradılıb. Bundan əlavə, ölkəmizin iqtisadi qüdrətinin artırılması isə onu ödəniş qabiliyyətli güclü tərəfdaşa çevirib.
Ermənistan-Azərbaycan münaqişəsinin həll olunması, Azərbaycanın öz torpaqlarını işğaldan azad etdikdən sonra sülh və əməkdaşlıq yolunu tutması ölkəmizin beynəlxalq aləmdə, xüsusən də sülh və təhlükəsizliyə birbaşa və böyük təsir göstərən hərbi təyinatlı məhsulların istehsalı və ticarəti sahəsində məsuliyyətli və etibarlı aktor kimi fəal rol oynamasına yardım edib.
Məlum geosiyasi ziddiyyətlər səbəbindən hazırda silahlara və silah ticarətinə nəzarət üzrə beynəlxalq rejimlər xeyli zəifləsə də, Azərbaycan bu sahədə beynəlxalq hüquq normalarına ciddi yanaşır və həyata keçirdiyi ticarət fəaliyyətinin beynəlxalq sülh və təhlükəsizliyi təşviq etməsinə xüsusi diqqət yetirir.
Deputat qeyd edib ki, bütün bunların nəticəsində qabaqcıl hərbi sənayeyə malik dövlətlər Azərbaycanla hərbi məhsulların ticarəti, birgə istehsalı, o cümlədən texnologiya transferi sahəsində yaxından əməkdaşlıq etməyə can atırlar. Hazırda Azərbaycanın hərbi-texniki əməkdaşlığı çox geniş coğrafiyanı əhatə edir. Ölkəmiz iyirmiyə yaxın dövlətə hərbi təyinatlı məhsul ixrac edir, hərbi sənaye sahəsində dünyanın əsas aparıcı dövlətlərinin demək olar ki, hamısı ilə əməkdaşlıq edir. Bu müstəvidə qardaş və müttəfiq Türkiyə xüsusilə qeyd edilməlidir. Türkiyə ilə bu sahədə əməkdaşlıq ölkəmizin müdafiəsi və hərbi sənayesinin inkişafı baxımından böyük rol oynayıb. Eyni zamanda, vaxtı ilə Azərbaycana hərbi və ikili təyinatlı məhsulların satılmasına Avropa miqyasında tətbiq edilən məhdudiyyətlərə baxmayaraq, ölkəmizlə bu sahədə əməkdaşlıqdan çəkinməyən dövlətləri, xüsusilə İtaliya, Slovakiya, Çexiya və digərlərini qeyd etmək lazımdır.
Q.Məmmədov vurğulayıb ki, İtaliya Respublikası Nazirlər Şurasının sədri Ciorcia Meloninin Azərbaycana son səfərinin və ölkə rəhbərliyi ilə apardığı danışıqların iki dövlət arasında kifayət qədər güclü olan hərbi-texniki əməkdaşlığı keyfiyyətcə yeni mərhələyə yüksəldəcəyini gözləmək olar. Bütövlükdə, ölkəmizin hərbi təyinatlı məhsulların istehsalı və beynəlxalq hüquq normaları çərçivəsində xaricə ixracı sahəsində fəaliyyəti beynəlxalq sülh və təhlükəsizliyə töhfə verən təqdirəlayiq fəaliyyət və mühüm uğur kimi qiymətləndirilməlidir.
Bölmənin digər xəbərləri
