DÜNYA
ÇİNLƏ TURİZM SAHƏSİNDƏ ƏMƏKDAŞLIQ GENİŞLƏNİR
Gənclər, idman və turizm naziri Əbülfəz Qarayev Çinin Bakıdakı səfiri Çjan Siyun ilə görüşmüşdür. Nazirliyin mətbuat mərkəzindən bildirmişlər ki, görüşdə iki ölkə arasında əməkdaşlığın inkişaf etdirilməsi məsələləri müzakirə olunmuşdur. Çin diplomatı Azərbaycan məktəbliləri arasında “Sən Çin haqqında nə bilirsən?” mövzusunda müsabiqə keçirmək barədə səfirliyin təşəbbüsünü dəstəklədiyinə görə Əbülfəz Qarayeva öz minnətdarlığını bildirmişdir.
Əbülfəz Qarayev Ermənistan-Azərbaycan, Dağlıq Qarabağ münaqişəsi ilə əlaqədar ölkəmizin ərazi bütövlüyünün tanınmasında Çinin prinsipial mövqeyini vurğulayaraq demişdir ki, respublikamız da öz növbəsində beynəlxalq səviyyədə Çini dəstəkləyir. Belə ki, Azərbaycan 2003-cü ildə Dünya Turizm Təşkilatının Baş Məclisinin, 2008-ci ildə yay Olimpiya oyunlarının Çində keçirilməsinə səs vermişdir.
Görüşdə beynəlxalq nəqliyyat layihəsi - Böyük İpək Yolunun bərpa edilməsi çərçivəsində Azərbaycan turistləri üçün Çinə və Çin turistləri üçün Azərbaycana turizm marşrutlarının artırılması barədə təklif səslənmişdir.