DÜNYA
Ciorcia Meloni ilə Donald Tramp arasında telefon danışığı olub
Roma, 7 noyabr, AZƏRTAC
İtaliyanın Baş naziri Ciorcia Meloni və Amerika Birləşmiş Ştatlarının yeni seçilmiş Prezidenti Donald Tramp arasında telefon danışığı olub.
AZƏRTAC xəbər verir ki, bu barədə İtaliya Nazirlər Şurası məlumat yayıb.
Məlumata görə, telefon danışığı zamanı Ciorcia Meloni Donald Trampı seçkilərdə qazandığı qələbə münasibətilə təbrik edib. Liderlər rəsmi Roma və Vaşinqtonun müttəfiq, strateji tərəfdaş, dərin tarixi dostluğa malik olduğunu bildiriblər.
Bundan başqa, Ukraynadakı müharibə, Yaxın Şərqdəki böhran, qlobal sabitlik və təhlükəsizlik, həmçinin Avropa İttifaqı ilə əlaqələr çərçivəsində əməkdaşlıq və ikitərəfli münasibətlərin möhkəmləndirilməsi barədə müzakirələr aparılıb.
İtaliya Prezidenti Sercio Mattarella da Donald Trampa təbrik məktubu ünvanlayıb. Sercio Mattarella İtaliya və ABŞ-ın qlobal miqyasda davam edən ciddi böhranların səmərəli həlli yollarını axtarmasının vacibliyini qeyd edib.
Nihad Budaqov
AZƏRTAC-ın xüsusi müxbiri
Roma
