Coğrafiya İnstitutunda sudan səmərəli istifadəyə dair müzakirələr aparılıb
Bakı, 20 fevral, AZƏRTAC
Akademik Həsən Əliyev adına Coğrafiya İnstitutunun “Sudan İstifadə Sahəsində Mütəxəssislər” İctimai Birliyi ilə birgə iclası keçirilib.
İnstitutdan AZƏRTAC-a bildirilib ki, tədbirdə elmi müəssisənin direktoru, akademik Ramiz Məmmədov yığıncağın gündəliyi barədə məlumat verib.
Sonra İctimai Birliyin icraçı direktoru, coğrafiya üzrə fəlsəfə doktoru, dosent Rəşail İsmayılov təmsil etdiyi qurumun 2020-ci ildəki fəaliyyətindən danışıb. O, gənclərə sudan səmərəli istifadəni aşılamaq, onların su haqqında elmi biliklərini artırmaq, cəmiyyətin diqqətini bu sahəyə yönəltmək məqsədilə İctimai Birliyin “Ətraf mühiti dövlətimizlə birlikdə qoruyaq” layihəsi haqqında məlumat verib, gənclərə müvafiq təlimlərin keçirilməsi, Böyükşor gölünə ekskursiyanın təşkili kimi məsələlərə toxunub. Bundan əlavə, İctimai Birliyin əməkdaşlarının su ehtiyatlarından səmərəli istifadə barədə KİV-də çıxışları, vebinarlarda iştirakı, habelə Vətən müharibəsinin gənc qəhrəmanları barədə hazırlanmış videoreportaj haqqında məlumat verib, iştirakçıların suallarını cavablandırıb.
İclasda, həmçinin görkəmli hidroloq, professor Saleh Rüstəmovun anadan olmasının 110 illiyi ilə bağlı Azərbaycan Coğrafiya Cəmiyyəti, Coğrafiya İnstitutu və “Sudan İstifadə Sahəsində Mütəxəssislər” İctimai Birliyinin birgə təşkilatçılığı ilə konfransın keçirilməsi qərara alınıb.
Bölmənin digər xəbərləri
