“COP28”-in prezidenti: İqlim dəyişikliyinin fəsadlarının aradan qaldırılması üçün maliyyələşdirmə zəruridir
Bakı, 1 dekabr, AZƏRTAC
İqlim dəyişikliyi fəaliyyətinin maliyyələşdirilməsi onların nəticələrinin aradan qaldırılması üçün əsas vasitələrdən biridir.
AZƏRTAC xəbər verir ki, bunu BƏƏ-nin Sənaye və qabaqcıl texnologiyalar naziri, “COP28” İqlim Sammitinin prezidenti Sultan bin Əhməd əl-Cabir deyib.
“Hamımız bilirik ki, iqlim dəyişiklikləri ilə mübarizənin gündəmində uğurun əsas amili maliyyələşdirmədir. Bu maliyyə resursları uzun müddət əlçatmaz olub, buna görə də, Sammitdəki rəhbərliyimiz Qlobal Cənubun iqtisadi inkişaf və iqlim fəaliyyətini davam etdirmək tələbləri arasında seçim etməməsi üçün maliyyə resurslarının cəlb edilməsini nəzərdə tutur" - deyə, Sultan bin Əhməd Əl-Cabir Dubayda “COP28” İqlim Sammitinin açılışında qeyd edib.
“COP28” İqlim Sammiti dekabrın 12-dək davam edəcək. Konfransda 140-dan çox dövlətin liderləri və müxtəlif ölkələrdən 70 mindən çox nümayəndə, o cümlədən iri biznes və qeyri-hökumət təşkilatlarının nümayəndələri, tədqiqatçılar, ekspertlər və jurnalistlər iştirak edirlər.
Bölmənin digər xəbərləri
