İDMAN
COP9 Bürosunun sədri: İdman sahəsində böyük işlər görməyə və təcrübələrimizi bölüşməyə çalışırıq
Bakı, 6 mart, AZƏRTAC
COP9 çərçivəsində ilk dəfə olaraq Bakıda rəsmi görüş keçiririk.
AZƏRTAC xəbər verir ki, bu sözləri COP9 Bürosunun sədri Mater Ba Bakıda keçirilən İdmanda dopinqə qarşı Beynəlxalq Konvensiyaya Tərəf Ölkələrin IX Konfransı (COP9) Bürosunun ilk rəsmi görüşü barədə danışarkən deyib.
O, tədbirin təşkilinə görə Azərbaycan tərəfinə minnətdarlığını bildirərək deyib: “İdman sahəsində böyük işlər görməyə və öz təcrübələrimizi bölüşməyə çalışırıq. İndi bir neçə məsələ barədə müzakirələr aparılacaq. Məqsədimiz təmiz idmanı təbliğ etməkdir”.
COP9-un Konvensiya üzrə icraçı direktoru Marsellin Dali Azərbaycanda olmaqdan məmnunluğunu ifadə edərək vurğulayıb: “Belə gözəl ölkəyə dəvət olunduğumuz üçün Azərbaycanın gənclər və idman naziri Fərid Qayıbova təşəkkür edirəm. Bakıda konfransın təşkili ilə bağlı qərarı ötən il qəbul etmişdik. Biz burada öz təcrübəmizi bölüşmək istəyirik”.
Qeyd edək ki, tədbirdə Konvensiyanın monitorinq sisteminin təkmilləşdirilməsinə və Konvensiyanın müddəalarının həyata keçirilməsinə imkan yaratmaq üçün iştirakçı dövlətlərə dəstək kimi COP8 tərəfindən tələb olunan nəticələrin və təkliflərin çatdırılması məsələləri müzakirə olunur.