Cüdo üzrə Olimpiya çempionu Nazim Hüseynovun 50 illik yubileyi qeyd olunub
Bakı, 2 avqust, AZƏRTAC
Avqustun 2-də Azərbaycan Cüdo Federasiyasında (ACF) Olimpiya çempionu, milli komandamızın məşqçisi Nazim Hüseynovla görüş olub.
Azərbaycan Cüdo Federasiyasından AZƏRTAC-a verilən məlumata görə ACF-in baş katibi Elmar Babanlı təcrübəli mütəxəssisi 50 yaşı tamam olması münasibətilə federasiyanın rəhbərliyi və ölkənin cüdo ictimaiyyəti adından təbrik edib, ona cansağlığı, Azərbaycan idmanının inkişafında yeni-yeni nailiyyətlər arzulayıb.
Sonra yubilyara ACF-in xüsusi hədiyyəsi təqdim edilib.
Nazim Hüseynov təbrikə və xoş sözlərə görə minnətdarlığını bildirib.
Qeyd edək ki, Nazim Hüseynov dünyanın tanınmış cüdoçularından biridir və azarkeşlərin yaddaşında dərin iz buraxaraq onların sevimlisinə çevrilib. Olimpiya çempionu və digər nüfuzlu yarışların qalibi və mükafatçısı olan Nazim Hüseynov Azərbaycanda cüdonun inkişafı və dünya miqyasında tanınması istiqamətində mühüm xidmətlər göstərib.
Bölmənin digər xəbərləri
