QAN YADDAŞI
Daşkənddəki Azərbaycan Mədəniyyət Mərkəzi Xocalı soyqırımı ilə əlaqədar anma mərasimi keçirmişdir
Daşkənd, 24 fevral (AZƏRTAC). Daşkənddəki Azərbaycan Mədəniyyət (AMM) Mərkəzi Xocalı soyqırımı ilə əlaqədar anma mərasimi keçirmişdir.
Tədbirdə Azərbaycan diasporunun üzvləri, ədəbiyyat, mədəniyyət və incəsənət xadimləri, qardaş özbək xalqının nümayəndələri, jurnalistlər iştirak etmişlər.
AMM-in sədri Mobil Məmmədov demişdir ki, 20 il bundan əvvəl fevralın 25-dən 26-na keçən gecə qaniçən erməni cəlladları keçmiş sovet imperiyasının 366-cı motoatıcı alayının bilavasitə iştirakı ilə Xocalı şəhərini yerlə yeksan etmiş, dinc sakinlərə - qocalara, qadınlara, uşaqlara aman verilməmiş, südəmər körpələr süngüyə keçirilmiş, onlar məhz azərbaycanlı olduqlarına görə əzabla öldürülmüş, şəhidlərimiz təhqir olunmuşlar. Sədr demişdir ki, əsir götürülmüş insanlar da ağlasığmaz zülmə, işgəncələrə, təhqirlərə məruz qalmışlar.
Daşkənddə yaşayan şair İxtiyar Rza, Azərbaycan Mədəniyyət Mərkəzinin şəhər şöbəsinin sədri Kamil Kərimov və başqaları Xocalı soyqırımının ermənilərin xalqımızın başına gətirdikləri cinayətlərin qanlı səhifələrindən biri olduğunu vurğulamış, onların zaman-zaman törətdikləri qanlı qırğınları pisləmişlər.
Sonda mərasim iştirakçılarına Xocalı soyqırımı ilə əlaqədar məlumatlar toplusu paylanmışdır.
Qulu Kəngərli
AZƏRTAC-ın xüsusi müxbiri
Daşkənd