Daxili xəstəliklər və nefrologiya sahəsindəki son elmi yeniliklər mütəxəssislərin müzakirəsində
Bakı, 17 aprel, AZƏRTAC
Tibbi Ərazi Bölmələrini İdarəetmə Birliyi (TƏBİB), Azərbaycan Daxili Xəstəliklər Dərnəyi və Türk Dövlətləri Nefrologiya Federasiyasının birgə təşkilatçılığı ilə Azərbaycan Daxili Xəstəliklər Dərnəyinin II Milli Konqresi Türk Dövlətləri Nefrologiya Federasiyasının I Konqresi başa çatıb.
AZƏRTAC xəbər verir ki, konqresin əsas məqsədi daxili xəstəliklər və nefrologiya sahəsində son elmi yeniliklərin müzakirəsi, qabaqcıl klinik təcrübələrin paylaşılması və beynəlxalq əməkdaşlığın genişləndirilməsidir.
Tədbirdə ölkənin tanınmış tibb mütəxəssisləri, türk dövlətlərinin baş nefroloqları, professor və elm xadimləri ilə yanaşı, Avropa Daxili Xəstəliklər Cəmiyyətinin sədri, Avropa Böyrək Assosiasiyasının yeni dövr üzrə rəhbəri, həmçinin Amerika Birləşmiş Ştatları və Yaponiyadan dəvət olunmuş nüfuzlu mütəxəssislər iştirak ediblər.
Konqresin açılış mərasimində Azərbaycan Daxili Xəstəliklər Dərnəyinin sədri Barat Yusubov çıxış edərək tədbirin əhəmiyyətini xüsusi vurğulayıb. O bildirib ki, belə beynəlxalq miqyaslı konqreslər təkcə elmi biliklərin paylaşılması ilə məhdudlaşmır, eyni zamanda, müxtəlif ölkələrdən olan mütəxəssislər arasında peşəkar əlaqələrin qurulmasına, təcrübə mübadiləsinin genişlənməsinə və səhiyyə sahəsində vahid yanaşmaların formalaşmasına mühüm töhfə verir.
Səhiyyə Nazirliyi Analitik Ekspertiza Mərkəzinin Tibbi nəzarət şöbəsinin müdir müavini Ramik Quliyev çıxışında səhiyyə sistemində keyfiyyət standartlarının yüksəldilməsi və tibbi xidmətlərin təkmilləşdirilməsi istiqamətində görülən işlərdən bəhs edib.
Milli Məclisin Səhiyyə komitəsinin sədr müavini Rəşad Mahmudov isə ölkədə səhiyyə sahəsində həyata keçirilən islahatların əhəmiyyətini diqqətə çatdıraraq, belə elmi platformaların bilik və təcrübə mübadiləsində mühüm rol oynadığını bildirib.
TƏBİB-in Tibbi fəaliyyətin təşkili departamentinin rəhbəri Teymur Mirzəbəyli çıxışında tibbi xidmətlərin təşkili, müasir yanaşmaların tətbiqi və pasiyent məmnuniyyətinin artırılması istiqamətində aparılan işləri vurğulayıb.
Professor Fredrik Von Vovern beynəlxalq təcrübənin paylaşılmasının əhəmiyyətini qeyd edərək, qlobal səhiyyə çağırışlarına qarşı birgə mübarizənin vacibliyini diqqətə çatdırıb.
Professor Mehmet Şükrü Sever böyrək xəstəliklərinin müasir müalicə üsulları və bu sahədə regional əməkdaşlığın perspektivləri barədə fikirlərini bölüşüb.
Professor Südeyf İmamverdiyev isə çıxışında elmi yeniliklərin praktik səhiyyəyə inteqrasiyasının vacibliyini vurğulayaraq, belə konqreslərin mütəxəssislər arasında bilik mübadiləsinə mühüm töhfə verdiyini qeyd edib.
Tədbir çərçivəsində müxtəlif ixtisas sahələrini əhatə edən paralel sessiyalar təşkil olunub. Elmi proqram ürək-damar xəstəliklərindən metabolik pozuntulara, revmatoloji və infeksion xəstəliklərdən endokrinoloji problemlərə qədər geniş mövzuları əhatə edib. Eyni zamanda, nefrologiya istiqamətində böyrək xəstəliklərinin müasir müalicə yanaşmaları, dializ və transplantasiya imkanları, genetik testlər və innovativ texnologiyalar üzrə müzakirələr aparılıb.
Konqres çərçivəsində ürək çatışmazlığı, aritmiyalar və kardiovaskulyar risklərin idarə olunması, diabet və onun ağırlaşmalarına müasir yanaşmalar, iltihabi və autoimmun xəstəliklər, tənəffüs sistemi və infeksion xəstəliklər, eləcə də süni intellektin tibdə tətbiqi kimi aktual mövzular üzrə müzakirələr keçirilib.
Konqresin yekununda həkim-rezidentlər arasında “Gənc nefroloqlar: Çətin klinik halların təqdimatı” adlı müsabiqə keçirilib. Müsabiqə çərçivəsində iştirakçılar mürəkkəb klinik halları təqdim edərək bilik və bacarıqlarını nümayiş etdiriblər. Təqdimatlar münsiflər heyəti tərəfindən qiymətləndirilib və qalib müəyyən olunub. Qaliblər münsiflər heyəti tərəfindən mükafatlandırılaraq təltif ediliblər.
Bölmənin digər xəbərləri
