“DəmirBank” onlayn kredit ödənişləri xidmətinin tətbiqinə başlamışdır
Bakı, 13 may (AZƏRTAC). “DəmirBank” həftənin bütün günlərində 24 saat fasiləsiz müştəri xidmətinin təşkili məqsədilə www.demirbank.az saytından kredit ödənişlərinin onlayn qaydada qəbuluna başlamışdır.
Bankdan AZƏRTAC-a bildirmişlər ki, saytın əsas səhifəsində “Onlayn kredit ödənişi” linkini açmaqla https://creditpay.demirbank.az/ qeydiyyatdan keçmək olar.
Qeydiyyat üçün PİN kodunu (şəxsiyyət vəsiqəsinin aşağısında olan eyniləşdirmə kodu, axırıncı rəqəm sayılmadan son 7 rəqəm), müştərinin özü tərəfindən təyin edilən 4 rəqəmli şifrə, telefon nömrəsini və e-mail ünvanını qeyd etmək lazımdır.
Qeydiyyatdan keçən müştərinin şəxsi kabineti yaranır. Müştəri PİN kodu və şifrəni qeyd edərək şəxsi kabinetinə daxil olur, ödəniləcək krediti seçir, plastik kartın tələb olunan göstəricilərini daxil edir, məbləği yazır və ödənişi həyata keçirir. Xidmət Azərbaycan, rus və ingilis dillərində fəaliyyət göstərir.
Sistemdə qeydiyyat pulsuzdur. Şəxsi kabinetdə ödəniş tarixçəsi saxlanılır. İstənilən vaxt ödənişlərə baxmaq və ödəniş qəbzlərini çap etmək mümkündür.
Bank müştərilər üçün eyni zamanda, bankomatlar, ödəniş terminalları və “Milli ön” terminalları ilə də kredit ödəmək imkanı yaratmışdır.
Bölmənin digər xəbərləri
