Deputat: Azərbaycanın bütün hərəkətləri beynəlxalq hüquqa söykənir
Bakı, 29 aprel, AZƏRTAC
İkinci Qarabağ müharibəsini döyüş meydanında Zəfərlə başa çatdırmağımız növbəti mərhələlərdə də uğurlara imza atmağımıza yol açıb. Prezident İlham Əliyev 2020-ci il 10 noyabr tarixli üçtərəfli Bəyanatı şanlı Qələbəmiz adlandırmışdı. Məlumdur ki, 30 ilə yaxın müddətdə beynəlxalq təşkilatlar və Ermənistana dayaq olan bəzi ölkələr keçmiş Qarabağ münaqişəsini dondurmaq istəyir və bu problemin həll olunmasına bir növ maneə törədirdilər. Prezident İlham Əliyev münaqişənin sülh yolu ilə həllinə çalışsa da, bu istiqamətdə təşəbbüslərlə çıxış edən dairələrin əsl məqsədini yaxşı bilirdi. Bununla yanaşı, atəşkəsin əldə olunmasına rəğmən, səngiməyən erməni təxribatları güclü ordunun yaradılmasını labüd edirdi. Ordunun qüdrətli olmasının təməl prinsiplərindən biri də gənclərin vətənpərvərlik ruhunda yetişdirilməsi idi. Odur ki, dövlətimiz gənclərin Vətənə və xalqa sevgi ruhunda tərbiyə olunmasına xüsusi yer verirdi. Aparılan islahatlar, həyata keçirilən düzgün siyasət özünü 2016-cı il Aprel döyüşlərində doğrultdu. Dörd gün ərzində Azərbaycan Ordusu öz gücünü qismən də olsa Ermənistana və havadarlarına göstərdi. Aprel döyüşlərində Ordumuzun gücünə bələd olan Ermənistana danışıqlar yolu ilə torpaqlarımızın qaytarılması kimi şans da verildi. Lakin ermənilər öz hiyləgərliklərindən əl çəkmədilər. Aldıqları zərbənin təsirindən özlərini Azərbaycanla razılaşmış kimi göstərsələr də, bir müddət keçəndən sonra yenidən öz ritorikalarına qayıtdılar. Təxribatlar, Ordumuzun bölmələrinin, yaşayış məntəqələrinin hədəf alınması 2020-ci il sentyabrın 27-nə qədər davam etdi. Həmin gün səbir kasamızdakı son damlanı daşıran Ermənistanın hərbi-siyasi hakimiyyəti və ordusu müharibənin başlayacağını, bu dəfə heç bir qüvvənin Azərbaycanı dayandıra bilməyəcəyini nəzərə almamışdı. Müzəffər Ali Baş Komandan, Prezident İlham Əliyevin bir əmri ilə “Dəmir yumruğa” çevrilən Ordumuz 44 gün ərzində 30 illik işğala son qoyaraq düşməni “ağ bayraq” qaldırmağa və kapitulyasiya sənədinə imza atmağa məcbur etdi.
Bu barədə AZƏRTAC-a açıqlamasında Milli Məclisin deputatı Azər Badamov bildirib.
Deputat qeyd edib ki, lakin həmin o biabırçı məğlubiyyət və rəzil duruma düşmələri belə ermənilərə dərs olmadı. Çünki müharibədən bir müddət keçəndən sonra yenə də ritorikasını dəyişən Ermənistan müxtəlif bəhanə və vaxt uzatmalarla sülh müqaviləsinin imzalanmasından yayındı. Bundan əlavə, rəsmi İrəvan üçtərəfli Bəyanatın 4-cü, 6-cı və 9-cu bəndlərini icra etmir. Əksinə, yeni təxribatlara əl atır, 2021-ci ildə istehsal olunmuş minaları Azərbaycanın azad olunmuş ərazilərinə gətirərək basdırır ki, bu da yeni terror hadisələrinə yol açır. Azərbaycan isə Ermənistanın revanşist əməllərinə səbirlə yanaşır və sülh müqaviləsinin imzalanmasına təşəbbüs göstərən tərəflərin təkliflərinə sadiqliyini nümayiş etdirir. Ermənistan isə ona dəstək olan Fransa və digər ermənipərəst ölkələrin, təşkilatların mövqeyindən ruhlanaraq yeni xülyalara qapılır, sülh müqaviləsinin imzalanmasını manipulyasiya etməyə çalışır. Bütün bunlara baxmayaraq, Prezident İlham Əliyevin qətiyyəti və sözünün üstündə möhkəm dayanması nəticəsində Praqa və Soçidəki görüşlərdə Nikol Paşinyan Azərbaycanın ərazi bütövlüyünü tanımağa məcbur oldu.
Son 2,5 il ərzində Azərbaycan Ordusunun şərti dövlət sərhədində öz mövqelərini möhkəmləndirdiyini deyən A.Badamov bildirib: “2020-ci ilin 10 noyabrında əldə olunmuş razılığa əsasən, Laçın şəhərinin içindən Xankəndiyə gedən yola alternativ olaraq yeni yol inşa edilməli idi. Prezident İlham Əliyevin qətiyyəti sayəsində həmin yol təqribən iki il ərzində inşa edildi və ümumiyyətlə, “dəhliz” adlandırılan ərazi yol statusu aldı. Ermənistan və Rusiyanın 2020-ci il 10 noyabr danışıqlarında “yeni Laçın dəhlizi”nin eninin 20 kilometr nəzərdə tutulmasına təkid etməsinə baxmayaraq, Prezident İlham Əliyevin səyləri ilə həmin ərazinin eni cəmi 5 kilometr müəyyənləşdirildi. Naxçıvana maneəsiz keçid məsələsi üçtərəfli Bəyanata salındı və bunun əsasında gələcəkdə Zəngəzur dəhlizin açılması üçün hüquqi baza hazırlandı”.
Diqqətə çatdırılıb ki, son 2,5 ildə Ermənistan dəfələrlə təxribatlar törətsə də, hamısının qarşısı çox uğurla alınıb və müzəffər Ordumuz hər dəfə düşmənə layiqli cavab verərək “Dəmir yumruğ”un yerində olduğunu sübut edib. Ermənilər Laçın-Xankəndi yolu vasitəsilə silah-sursat daşıyır, hərbçilərin rotasiyasını aparırdılar. Bu azmış kimi, Qarabağdakı təbii sərvətlərimiz talan edilib həmin yol ilə Ermənistana daşınırdı. Lakin dekabrın 12-də ekofəalların və ictimaiyyət nümayəndələrinin Laçın-Xankəndi yolunda fasiləsiz aksiyalara başlaması Ermənistanın həmin qanunsuzluqları davam etdirməsinə mane oldu. Laçın-Xankəndi yolunda qeyri-qanuni hərəkətlərini reallaşdıra bilməyən Ermənistan torpaq yollardan istifadə etməklə öz çirkin niyyətlərini həyata keçirməyə başladı. Ordumuz həmin ərazilərdə də nəzarəti bərpa etdi və nəhayət aprelin 23-də Laçın yolunun Ermənistana birləşən yerində Dövlət Sərhəd Xidmətinin sərhəd-buraxılış məntəqəsi quruldu. Təbii ki, bu, çox əlamətdar tarixi hadisədir. Bu o deməkdir ki, Azərbaycan dövlət sərhədlərini tam nəzarət altına aldı. Sərhəd-buraxılış məntəqəsinin yaradılması erməni lobbisini və ona dəstək verənləri dərhal hərəkətə keçməyə, ardıcıl bəyanatlar yaymağa məcbur etdi. Lakin dövlətimizin başçısının iradəsi və müdrik gedişləri heç bir beynəlxalq dairənin məsələyə müdaxiləsinə yer qoymadı. Azərbaycanın bütün hərəkətləri beynəlxalq hüquqa söykənsə də, təəssüf ki, bu gün yenə də münaqişələrə ikili standartlarla yanaşanlar var. Belə ki, Rusiyanı Ukraynanın ərazisinə müdaxilədə günahlandıranlar Ermənistan üçün Azərbaycandan ərazi qoparmağa çalışırlar. Təbii ki, bu, mümkün deyil. Qarabağdakı ermənilərə gəlincə, onların yeganə çıxış yolu ya Azərbaycan Bayrağının altına keçmək və ölkəmizin vətəndaşları kimi yaşamaq, ya da bu torpaqlardan birdəfəlik getməkdir. Ermənilərin bütün xəyalları və separatçı arzuları tarixin tozlu yollarında it-bata düşdü.
“Bu gün güclü Azərbaycan və onun uzaqgörən, iradəli Lideri - Prezident İlham Əliyev var. Hesab edirəm ki, ermənilər də Liderimizin rəhbərliyi ilə yaşamağa davam etsələr, öz xoşbəxt həyatlarını qura biləcəklər”, - deyə deputat fikirlərini yekunlaşdırıb.
Bölmənin digər xəbərləri
